Рукопись XVII-го столетия,

С.-Петербургской Императорской Публичной библиотеки.

Писанная

Богомудрым и Благородным Старцем

СПИРИДОНОМ ПОТЕМКИНЫМ

Бывшим из рода славных бояр Потемкиных

и Архимандритом Покровскаго монастыря.

Cм. старообрядчество; XVII век.

[Рукопись сия извлечена из дел Преображенскаго Приказа и Тайной розыскных дел Канцелярии].

Книга богомудраго старца Спиридона Потемкина.

иже богоугодно пожив в Покровском монастыре,

и преставися во 173-м году, месяца ноября, в 2 день.

Оглавление книги сея

О крестном знамении

О Святом Дусе

Слепии видящих водят

О связании сатаны на 1000 лет

О предотечах антихристовых

О Премудрости Божии

О нечювственных християнех

О антихристе

О пении аллилуия

Эпистолия диакона Феодора

Послание Андрея Клещеева к протопопу Аввакуму

Послание Аввакума протопопа к Андрею Клещееву

Слово первое.

О крестном воображении, и о сложении перстов десныя руки,

како подобает християном креститися рукою,

тако и священником подобает люди благословляти,

единым воображением.

понеже един есть крест Христов данный нам на освящение верным,

от Пастыря Христа.

Образ есть святаго воображения честнаго креста. иже возлагают православнии християне на лица своя. и о сложении перст, иже извести Бог Мелетием патриархом Антиохийским, арианом тогда хулящим приимати благословения от преосвященнаго руки сложения ради перстов, глаголя: не хощем приимати, зане многобожие возлагает на ны. аще бо у него Отец Бог, и Сын Бог, и Дух Святый Бог. како не три Бози. и того ради не приемлем его благословения, разве аще знамением известит Бог, тогда повинемся. Святый же исполнен благодати Святаго Духа, показа им прежде совокупив три персты и не бысть знамения. посем два совокупив и един пригнув и благослови люди. и абие изыде от руки его огнь аки молния и громогласно возопи глаголя: Троицу почитаем во едином Божестве. и тогда посрамишася ариане, и купно с православными падоша на лица своя пред патриархом, просяще прощения. купно же и благословения. и протолкова святый достохвально гласом, яко три персты совокупив знаменует Святую Троицу. а совокупление триех единство Божества. второе же совокупление двух перстов знаменуют Божество с человечеством Сына Божия, яко Той не оставив недра Отча сошед и бысть человек. а пригбением единаго от двух перстов, знаменует смирение, и послушание, страдание, и погребение и во ад сошествие по человечеству. просто же стоящаго единаго от двух, знаменует еже ничтоже пострада Божество с человечеством, но страждущее воскреси от мертвых. по воскресении вознесение знаменует, еже возносим персты, иже знаменует воскресение. просто стоящим со всецелым святолепным сложением во всех перстах десныя руки, юже и полагаем высоко на главе. Знаменует главу нашу Христа Сына Божия, выше всех церквей. а еже полагаем на пуп знаменует воплощение в пречистую утробу Богоматерню. а на десное рамо полагаем знаменует вознесение, и седение одесную Отца. и еже речет праведный Судия одесную стоящим: приидите благословеннии Отца Моего наследуйте уготованное вам царство, и прочая. а еже полагаем на шуее, знаменует еже речет праведный Судия стоящим ошуюю: идите от Мене проклятии во огнь вечный уготованный дияволу и аггелом его, и прочее. и сице с такими страшными догматы воображается крест Господа нашего Исуса Христа, на лицах християн православных с молитвою, яже возгласуют сему святолепному знамению креста Господа нашего Исуса Христа. яже есть сице: Господи Исусе Христе Сыне Божий помилуй нас. и помилуй мя грешнаго, поклон. тако предаша апостоли учеником Его, тако печатлеша кровию святии мученицы. тако прияша святии вселенския соборы. тако дойде до святаго Мелетия. тако страшно засвидетельствова Бог святым Мелетием. тако прият церковь и удержа цело до ныне. сие согласно со святою верою, и с непорочным символом святыя веры. сице держано во християнех, на всяк день от рода в роды. Кто смеет пременити, или приложити или отъяти что, разве от отпадших от веры християнския, иже глаголют хульныя глаголы. И на сию истинну глаголя, яко непокоривыи нашим исправлением зле персты слагают двух сынов воображают, единаго с Отцем, а другаго на землю в плоть сошедша, и по любви соединена. яко же Несторий блядословит, еже глаголют неистовым языком. не знают величества Сына Божия, яко силен есть, со Отцем седети неразлучно, и на землю снити непостижимо, яко вся могий и везде сый и вся исполняя. а не два яко же хульницы глаголют. церковь бо Того поет: яко Отча недра не оставль, сошед на землю Христе Боже, и прочая (глас 7 ирмос песнь 4). Но теми хулится, а нами прославляется, по божественному апостолу (1 Петра зач. 65). инии же на левое рамо возлагают небрегуще о сложении перстов сие подобным разумом махающе. инии же воплощения Господня не воображающе в перстах своих. но крест тремя персты знаменуют слагающе не зело мудрость. и прежде бо совокупляют два перста, а потом третий пригибают глаголя, яко тако Мелетий прописа, и чюдесем затверди. Егда вопрошаем, почто два перста прежде слагаете, а третий потом пригибаете. где сила ваших перстов сложения; где равенство Святыя Троицы, кая два лица прежде совокупляете и почто прежде воплощения Христова Троицею крест знаменуете. и почто прежде вознесения прописуете на челех ваших, глаголя: яко ваша глава Христос седит на небесех. А потом прописуете снитие во утробу девичу, полагающе те три персты на чрево свое. прежде ли Христос вознесыйся на небеса, а потом сниде во утробу девичю; и паки с пупа на десное рамо полагающе руку, мудрствуете вознесение. Знаменуете не прямо; а на шуее рамо полагающе руку, мудрствуете второму пришествию Христову знаменатися. кое согласие вашего мудрования, прежде нарекосте главу небо, а потом нарицаете рамо небо. где равенство главе с раменом; паки мудрствуют полагающе руку на левое рамо, знаменатися второму пришествию Христову на землю. где разум; чему верить; рамена бо человеча стоят равно, а небо со землею не равно стоят. а что глаголете знаменаяся сице развращение мудрствуете о том не пишите, не глаголите. егда вопрошают вас, но вся сия яже воспомянухом молчанием печатлеете. кая сила знамения вашего с такими неправдами. како сатана лгати научивый; убойтеся како предстанем распятому на кресте Господу нашему Исусу Христу в день суда. Той бо нам даде крест свой на прогнание всякаго врага и супостата. Той бо нас научи воображати того со святыми богословскими догматы. яко же выше предложихом во знамении святаго Мелетия патриарха и чюдотворца Антиохийскаго. аще ли речете яко сия не вся обретаются в житии святаго Мелетия. яже вообразихом нам то не равно. обычай бо той сатаны льстиваго, еже изтребляти истинну от божественных писаний а влагати лжу. той и отсюду сиречь от жития святаго Мелетия. еретическими языки вылизав, некую хулу составляет, не могий зрети на силу креста Господня. но сия вся яже прочтосте истиннаго суть прежде бо многих лет, тако прочтох писание. тако слышах глаголанное, тако держу до седин моих. с тем умираю на вск день. с тем стати имам пред страшным Судиею Христом моим. то похулити несть мощно никомуже от человек, разве ненавидящих креста Господня. согласует бо во всем с божественным писанием и со святою верою христианскою. и со символом православныя веры, инии же паки суть воображают крест на лицах своих странным законом, начинающе от Авраама, еже глагола Господь ко Аврааму: яко благословятся о тебе, и о семени твоем вся языки, и прочее. и насилуют воображати крест в пяти перстах, именем Исуса Христа литеры воображающе словенскаго языка, персты своими. и тако усилуют благословляти вся языки словенскаго языка литерами. Егда же вопрошают их которыми литерами благословляху тогда, егда не бе литер словенскаго языка. а вся языки благословляху; подобает ли тако яко глаголете литеры в перстах слагающе, их же несть мощно вообразити в перстах живых рук человеческих; Аще бо восхощеши в перстах учинити литеру слово, то несть мощно, разве учиниши крюк. у слова бо два конца, а у перста живаго един. аще восхощеши учинити хер; то несть мощно. разве учиниши ик. у хера бо четыре конца, а у перстов два конца. а егда восхощеши учинити литеру, I. и та бо два конца имать. а перст живый един, а титлом без которых несть мощно прописати имени Исуса Христа. не спрашивай у них прилога ради иже ко Исусу только пальцы отсечь, а тех перстов не будет не достанет и сложения благословящей руке по вашему. О горе пияным философом. паки аще вся языки тако подобает благословляти по вашему; то прежде по еврейски, по гречески, подобает воображати в перстах живыя руки человеческия. Потом по еллинскому и польскому языку, и во иных иже суть на земли всех 72 языка. и по вашему мудрованию всех их языками слагающе литеры в перстах рук человеческих благословляти. еже срамно есть и воспомянути, но понеже оне срамляхуся сицевых догмат людем не пияным предавати. несть мощно нам непияным сущим, за сие с ними не боротися. разве аще вознебрежем о истинне. где бо и когда сице, от начала веры, даже доныне в перстах рук человеческих выламывало в церкви на сие дело разве зде ныне в России. но да открыет нам Бог иже глаголет во откровении Богословли: се дах пред тобою двери отверсты и никтоже может затворити их. яко малу имаши силу, и соблюл еси слово Мое, и Аз тя соблюду от часа искушения хотящаго приити на всю вселенную. время бо то прииде, Той бо истинный да открыет нам крыемое вещи сея. понеже несть мощно вообразити им литер по их хотению. ниже бо когда воображения в перстах рук человеческих могло быти. сии же усилуют нуждею предаяти та, яко да всех народов в римскую приведут прелесть. да вси поклонятся пестрому зверю, сиречь, римскую папежу. приимут и того развращенныя догматы, наченшу от хуления на Святый Дух. и развращенная знамения креста Христова на лицах християнских. еже римляне развращенно опак воображают. и еже припевати ко органом, аще еще и не внесоша их в церковь. и еже сливати лица Святыя Троицы поюще богохульно глаголюще, Отца и Сына сливающе во едино лице. а Святаго Духа раболепно оставляюще глаголют, благословим Отца Сына и Святаго Духа. потом отъемлюще литеру, иже и змежду Отца и Сына и ко Исусу прилагают с лестию. да человечество Сына Божия разделяют во ин состав от Божества глаголя: да будет ти милость велика от Бога Спаса нашего Иисуса Христа. потом глаголют, и паки един свят един Господь Иисус Христос, и прочая иная развращенная глаголют, и поют. и их же никогда же знаяше церковь Христова, ея же врата адова не одолеют во веки, по словеси Господню. и не требует никакова исправления. того ради яко непогрешити может. исправления требует, непреклонну бо и недвижиму, тоя утверди Христос своею святою кровию, и в ней живет, и в ней царствует. и царствию Его несть конца. сугуб бо есть по естеству, сугубо и царствует. и божественному бо Его величеству не бе числа. тако и конца не будет, еже со Отцем и со Святым Духом. а по человечеству ныне царствует, и царствию Его не будет конец. дондеже положит враги своя подножию ног своих. яко же Павел мудрствует. и тогда будет Бог всяческая во всех вся по апостолу, и тогда будет едино царство Отца и Сына и Святаго Духа. и того ради нам заповеда Господь наш Исус Христос, просити молящися глаголя. да приидет царствие Твое, да будет воля Твоя, яко на небеси и на земли, не подобает нам последовати отступником в их прелесть. иже искупльшаго их Владыки отмещутся, и приводят в скорую себе погибель антихриста имети. сатана действует ухищряюще лукавыя догматы, купно с жидами. да отведет разумы человеческия от распятаго за ны Господа нашего Исуса Христа. да возглаголют хулу на дрожайшую кровь Его Спаса нашего. и того ради вся ныне поучения в людех в законе Моисеове, и во пророцех ветхаго завета. яже вся сия до Иоанна по словеси Господню, а святаго евангелия не хотят не токмо послушати, яко подобает християном, еллинскому блядословию учителей возлюбиша, паче апостолов Христовых, латынския догматы паче учения Христова. прочее чесо ожидати; разве да поклонятся прелести вси живущии на земли. и дадут славу зверю пестрому по писанию. О небрежению, о прелести, о плотскаго мудрования. еже враждует на Бога, слыши небо и внуши земля глаголы рабов Христовых, им же несть уже где главы подклонити. везде гоними отвсюду изгоняеми, их же живых убо ненавидят. а по смерти мертвым покланяются, и без пользы почитают, и зиждуще гробы пророком, украшающе раки праведных. они же вопиют к Богу глаголя, доколе Владыко святый и истинный не судиши и не мстиши крови и гонения нашего от живущих на земли. но сия вся взыскана будут праведным Судиею вскоре. не коснит бо Господь по апостолу, яко же неции коснение мняху, но грядет скоро, не бе доволен сатана в крови святых апостол и святых мученик. но уведав в божественном писании яко развязан бысть от темницы на время, да льстит языки [Апок. глава, 20]. и начат прельщати люди обычаем древния своея злобы, яже в раи бысть. и уведал что глаголет апостол Павел ко евреом (зач. 303). яко многочастне и многообразне древле глагола Бог ко отцем пророки напоследок же дни глагола нам Сыном, Его же положи наследника вскм, Им же и веки сотворил. начат и той скрыватися яко же во змию иногда. ныне же в персты рук человеческих, скрывши в них хулу на Святый Дух прельсти род християнский. аще возможно будет и избранныя; но молитвами святаго Мелетия, да избавлени будем таковыя прелести. сей бо нам сказа яже от ариан хулу, не точию на кресте; но и самыя Святыя Троицы таинство. сей бо вообрази сложение истинно християнских перстов, показа бо соединив, или совокупив три персты, да покажет в них неразделимо единство Святыя Троицы. посем два совокупив, и един пригнув и благослови люди, и прочее. яко же напреди речеся. а противнии глаголют, яко показа Мелетий три персты, разно стояща особь койждо, потом два совокупив, един пригнув, и благослови люди, и прочее. кая зде вера. где образ неразделимыя Троицы юже не образуют. но разделение показует. отнюдуже несть образ веры християнския; но еллинския многобожия еже глаголют. два от трех совокупив, и третий ко двум пригнув благослови люди. где равенство, почто два совокупив, а третий оставляют. кая зде вера образуется разве римская. зри всяк яко не могуще словами боронитися от божественных писаний. за ересь хуления на Святый Дух скрывают хулу в перстах рук человеческих. да покажут в преидущее время в перстах, яко Дух Святый от Отца и Сына исходит от двух третий еже и печатным книгам присовокупиша. да крепко держано будет, а не хотевших приимати таковыя их прелести многих изгнаша, многих уязвиша, многих умертвиша. им же мзда будет на страшном суде Христове в день судный. а еже воображают на лицах своих литеры в перстах IС XС, воображающе и имя Господне вообразити усилующе. яко же речеся, сии со мною яко небрегоша глупейших людей вас паче пияных, еже туман во очи пущати, и на левое рамо прежде возлагати крест. а литерами глаголати суис слово латынское. а еже сказуется суим римским языком да покажут яко правая рука благословляет крестом церковным; а левая своим римским, глаголю опак на левое рамо. а егда вопрошают их, силы такова знамения: отвещают, яко того ради возлагаем прежде на левое рамо, яко Пан наш прежде вступил до пекла. а потом до неба. а более глаголют мудрствовати не велит нам костел римский. О плотскаго мудрования еже враждует на Бога. яко рамена человеча стоят равно, а небо с пеклом не равно стоят, но несть мощно сего толковати прежде збытия дондеже сами возглаголют о своей сей премудрости. не мощно не глаголати всякому ощутити, яко не токмо вся ереси и крещение всех еретик прияша, но и сатаны отрицатися, и на сего плевати на крещении не велят; а последних времен и последних прелестей антихристовых воспомянути не хотят, точию не смеют. аще явно глаголати, яко ничто же будет и не силна яко же Христос глагола во евангелии купно со жидами мудрствуют, яко еще не прииде Христос. но приидет. тако бо уже и поют яко же прияша от прелести глаголя. пою Тя слухом Господи услышах и убояхся. до мене бо идеши, мене ища заблуждьшаго, и прочая. может ли християнин тако мудрствовати; или тако пети; еже до мене бо идеши мене ища заблуждьшаго. Христу пришедшу антихриста поюще, антихриста и ждут. а истиннаго Христа Бога нашего отметаются; церковь бо Христа Бога нашего поет глаголя: пою Тя слухом Господи до мене бо пришед, и мене ища заблуждьшаго, и прочая. или еще глаголют хульницы яко не подобает приимати пресвятыя Богородицы в число родов четырех надесять. аще и евангелист прият или биением им обезчестити Спасову непорочную кротость оболгающе; или еще даде Христос Петрове мзду велию, еже на нем создати церковь, да исповесть Его Сына Божия. или иная безчисленная хуления в новых книгах положенная. о них же нелепо есть глаголати истинну, речение святаго евангелие. аще ли же ни то исполнится божественное писание. скоро еже глаголет день Господень яко тать в нощи приидет. егда бо рекут мир и утвержение, тогда абие нападет на них внезапу всегубительство; ему же несть мощно сбытися. егда вознебрегут прежде о растлении божественных писаниих и церковных догматов. и приемше лесть за истинну изтребят из церкви всяку истинну рекут мощно нам мир и утвержение, и тогда нападет на них всегубительство по божественному писанию. но да взыщет яко же глаголют нам мощно ли неравенства ради перстов погрешити в разуме вещи сея, или ни; аще бо и не равны устроил Бог у руки человеческия. но равныя возмем сподобил чести ни долгота бо ни дебельство не возвышает в лучшее. ниже тонкость смиряет коего от них, на и сопротивных бывает бо в человецех яко мний плотию презвитер от пономаря долгаго почитаем бывает. такожде и господин мал телом от большаго раба не токмо почитаем, но предстояти себе велит со страхом. а раб велик сый послушает его. тоже обрящеши и в Давыде с Голияфом. тоже обрящеши разума полон весь мир, яко не многоплотное величает, не и меншое смиряет. отнюдуже должни суть по немалом что изтрезвившеся отврещися сего своего от перстов суемудрия, а повинутися чудотворному совокупления святаго Мелетия. не хотят о сложении перстов. Пролог февраля 12 день. Скрыжаль лист 807 и 808, и 809, 812, 813. и до конца. не точию но и патриарх бывает менши диякон возрастом, но честию всегда бо той повинуется патриарху. а в перстах ни единаго с другим обрящеши равно. но вся пять равну честь имут. А еже глаголет писание болий быти в вас да будет всех менши, того противнии дуси слышати не хотят, точию да сокрыют лести непрощеннаго нечестия, в сложении перстов. а еже писание глаглет, яко плотское мудрование вражда на Бога, закону бо Господню не покаряется, ни может бо. сие смех им есть, и ругательство. нам же мнится страшнаго сего прещения ничто же быти может. яко мудрование плотское сице вводит во отчаяние, яко несть мощно уже воззрети к Богу, и закону Божию покоритися что дивно яко хулят или от истинны отвращаются; или к басням уклоняются, или лести составляют; не брегуще о святом евангелии, им же бо несть тем кто будет; разве сатаны льстиваго. той бо видя душу в непрощенном нечестии погибающу, поемлет яко свою, и действует яко свое научает хулити Бога, научает смущати Церковь Божию, покорно вводящи всех християн в непрощенное нечестие, сице, яко ниже кровь мученическая очистити не может, сего нечестия. Еже рещи слова на Святый Дух, и смущати церковь Божию: где покаяние; о глубина бездны нечестия. о вражды горее жидовския, но и легеон демонский получи милость от Бога. и аще бы хотел каятися. негли получил бы и оставление. А сие непрощенное нечестие еже рещи едино слово хульно на Святый Дух прежде страшнаго суда, суд приемлет. яко не оставится ему ни в сем веце ни в будущем. зри всяк со вниманием бездонную сию глубину погибели, яко суета есть вся яже надежды в покаянии, не токмо бо слезы не суть достойны и полезны. ниже рыдание, но ниже мученическая кровь пользовати может похулившаго единою. всеми соблазны и всеми грехи обремененных призывает Господь на покаяние. от сего же непрощеннаго нечестия заключи Господь всякое оставление в сем веце, и в будущем. а еже нецыи ласкают друг друга надеждею покаяния уже да во отрадовании поживут. тии сами узрят, реченное; небо и земля мимо идут, а словеса Господня не имут прейти.

Аминь.

Слово, 2.

О Святом Дусе Господе истиннем.

якоже речеся мечь духовный глагол Божий.

а иже похулит Дух Истинный,

сие непрощенное нечестие ни в сем веце ни в будущем.

чтый сия со вниманием мечь духовный глагол Божий.

О христолюбцы! взыщите истины. Бога ради истиннаго; взыщите Истиннаго! крови ради Христовы. взыщите Истиннаго! кого сия не подвигнет ко взысканию взыщите своего ради спасения, да не прельстимся, мощно ли кому любити Христа; отметаяйся словес Христовых; аще мощно; научите мя. аще ли же ни не отметайте, отметающиися приводят себе скорую погибель по писанию. кая уста сравняются со Христовым. испытайте писания. аще обрящите, научите мя ащели же ни не отметайтеся. кое слово сравнится Христову слову. кая богословия уподобися Христовой богословии. Аще обрящете, научите мя. ащели же ни не отметайтеся. кто свят явися не прием святыни от Истиннаго; кто явися праведен не прием правды от Истины. Един есть Истинный иже ни от кого же прият истинства, но сам по своему естеству истинный. сего ради Христос истинный Бог наш, богословствуя о равночестном и соприсносущном Ему истинном Дусе, глаголет сице; егда же приидет Утешитель, Его же Аз послю вам от Отца Дух истинный, иже от Отца исходящь. кая честь сравнится хвале сей, еже есть Дух истинный иже от Отца исходит; всякое слово похвальное приглаголуется и твари но никтоже во твари истинный есть. приимет от Истинна по достоянию кожде а не по естеству. сего ради никтоже есть истинен собою. токмо един Бог Святая Троица сиречь един есть Отец Бог истинный, и един есть Сын Бог истинный, и един Дух Святый Бог истинный. Его же аще наричеши Бога, а не приложиши истинный. то ни что же рекл еси к похвалению истинныя славы Его. аще же наречеши Его Бога, нарицается и тварь. аще наречеши царем, нарицается и тварь. аще наречеши Господем, нарицается и тварь. аще наречеши животворящим, нарицается и тварь. но никто же от сице нарицаемых истинный есть. и того ради нарицается Дух истинный. яко ни от кого же прият величества, но сам по своему естеству велик есть, и всем тварем дает живот и дыхание и движение. вся бо тем живут и движутся, сам же Той ни от кого же величества приемлет, но сам по своему естеству велик и истинен есть. того ради непорочными усты истиннаго Сына Божия нарицается Дух истинный, иже от Отца исходит, что сего наречения более на небеси и на земли. взыщите, аще обрящете научите мя. аще же ни не отметайтеся словес Христовых. страшно бо глаголет Господь. аще пребудите в словеси Моем, воистинну ученицы Мои будите и разумеете истинну. и паки; аминь, аминь глаголю вам, аще кто слово Мое соблюдет, смерти не узрит во веки. а отметающийся Мене, и не приемляй глагол Моих. имать судию слово еже глаголах то судит ему в последний день. и паки, всяк преступаяй и непребываяй во учении Христове, Бога не имать. Оле глубины погибельныя, яко преступления единаго словеси Христова не имети Бога. и сочетану быти еллином по писанию. где суть глаголющии яко святии отцы в символ истиннаго не вложиша. да скажет нам, коея ради вины не вложиша. или коим разумом. како преступили слово Господне. пророк бо пророка не послушав преступив слово Господне токмо хлеба вкусив, и воды испив, тамо идеже повеле Бог, зол явися и убиен бысть от зверя. а ратующиися с Македонием святии отцы за честь истиннаго, и в символе Истиннаго не вложити, дивно есть прочее. скажите ми отметающиися истиннаго. коея ради вины не вложиша святии отцы в символ православныя веры истиннаго. или не вероваша тако, яко Христос рече, или не ведяху о сице страшном запрещении, на отметающихся словес Христовых, или грамоте неумеяху. прочее скажите. аще же скажите, яко не вемы, то ударяетеся по лицу срама ради вашего прежде суда Христова. несть бо тяжчайшаго греха, яко похулити Духа Святаго истиннаго в символе не исповедуем то явися хула. отъемляй бо честь истиннаго, како не хулит. и не хотяй бо хвалити токмо хульник есть по словеси Господню. иже рече несть со Мною на Мя есть, и иже не собирает со Мною расточает. сего ради глаголю вам. яко всяк грех и хула отпустится человеком, а на Святаго Духа хула не отпустится человеком ни в сий век, ни в будущий. жестоко Македонию противу рожну пратися, преможе Христос со святым евангелием вся глаголы противныя. и языки велеречивыя. открывается гнев Божий на всяко нечестие и неправду человек, содержащих истинну в неправде. не первая то напасть на церковь Божию из врат адовых изниче. но Истинный глаголет яко врата адова не одолеют ей. аще бо и непрестанно враг ратует церковь Христову, реки испущает от уст своих да потопит ю но земля работает и творит повеленная. прочеее вопрошаю, как мощно бе преступити святым слово Христово. и не исповедати Истиннаго и не вложити в символ предающе его всему исполнению церковному, и исповедати яко же символ глаголет. и сице не вложивше в символ по словеси Христову истиннаго. и явитися преступником учения Христова, научите мя. аще несть мощно: то не облыгайте святых. страшно бо писание глаголет, яко будут даны зверю уста хульна глаголати на Бога и на святых Его. и отверзе змий уста своя в хулении к Богу хулити имя Его и селение Его, и живущая на небеси. и паки, ища учения от вас вопрошаю. кто в кое время приемше символ без истиннаго, и смеяше приложити истиннаго; несть бо мощно утаитися коему собору, ни времени его. ниже имени наченшаго сие. аще же ни сего весте. то аз вам скажу. кто начат изметати истиннаго от символа православныя веры, и в кое время, и кто по имени и коим разумением. хула бо сия не менши Македония. но и много больши. он бо явно хуляще Дух Святый истинный, глаголет тварь быти того. а не единосущна Отцу и Сыну. они же ныне с помраченою прелестию содержаще истинну в неправде глаголют яко веруем в Духа Святаго Господа истиннаго иже от Отца исходящаго, но несть нам мощно исповедати сице, зане костел святый Римский едино отмещет а другаго не приемлет. а мы унеяты тому повинуемся. несть бо мощно тому блудити в вере, еже он приложил мы приемлем в церковь свою. да сохранит Христос от таковаго раздора, един бо Господь, и едина вера, и едино крещение. и от избытка сердца уста глаголют по словеси Господню. в 2-й главе Откровения Богословля, глаголет бо Дух Божий. и прииде ангел с небесе, имея ключь бездны, и уже великое в руце своей, и ят змию древнюю, иже есть сатана и диявол. и связа его на тысящу лет, и в бездну вверже его. и заключи его и запечатле его над ним да не изыдет оттуду дондеже скончается 1000 лет, да не льстит народов. по скончании же 1000 лет подобает ему разрешену быти на мало время, да льстит народы. кая сила словеси Его, и что есть еже связану быти дияволу на 1000 лет да не льстит народы. и паки развязан бысть на мало время да льстит народы. Оле тайны, яко по связании сатанином явишася престоли и седящии на них, и суд дан бысть им, и прочая. по скончании же тысящи лет, искочив из бездны отторже хоботом своим третию часть звезд небесных, еже есть отступление от веры, звезд церковных. и даде власть свою и престол свой зверю пестрому. по скончании же шести сот лет, паки ухитри по действу сатанину лукавый. второе отпадение от веры звезд церковных. и паки по скончании шестидесяти лет ухитри враг третие отступление от веры звезд церковных. прочее же что по шести летех явися не вемы, а предшедшия три отступления ухитри враг поставити яко да вси отступающии от веры погибнут в непрощенном нечестии, сиречь в хулении пресвятаго и животворящаго Духа Господа истиннаго. в первом бо отступлении похулиша Дух Святый истинный, глаголя Его быти рождение от Отца и от Сына. во втором же отступлении похулиша Дух Святый истинный отвращающеся истинства Его. да не исповедан будет в символе истинный. в третием же отступлении от веры похулиша Дух Святый истинный со оболганием святаго вселенскаго собора. яко забыша святии отцы вложити в символ истиннаго и не точию сие реша. но и все вселенския соборы похулив отвергоша. и вместо их своя новоухищренныя седмосокраментов римских ввести в церковь усилуют. по совету вогнездившеся на западе, иже тогда устремитися ему развратити где благочестие есть. ведый немощь свою, яко врата адова не одолеют церкви Христовой. посылает единых предотечей с прелестными ухищрении, еже хулити Дух истинный. а других посылает воздвигнути внешнюю брань со окрестными, да убиют друг друга, да проходит мечь да развратится ум, да раздвоится совесть в людех. наипаче же во владущиих над людьми. яко да аще и ощутят благочестие от супостат вреждаемо, но не возмогут противу стати им ратным на них нахождения. губитель же рода человеча, и враг веры Христовы. ведый яко время мало имать, грех ради наших Богу попущающу. он всеми силами, и всем своим злокозненным советом усилует. абие единым стремлением отъяти у християн веру, и крещение, и священство; и егда видит яко за сие ратуются божественным писанием и не отступают. тогда абие тщится веру истинную повредити прилоги еретическими, да не познают вернии, но да прельстятся. яко же и прочии отступницы от истинны во лжу. такождеже и крещение истинной едино ведый в церкви Христовой просвещающее тщится отъяти, но не могий. ухищряет соединити с еретическими прилоги, да не познают вернии, но да прельстятся приемше проклятых крещение. подобно же и священство, егда видит от Христа в нас действуемое возложением рук Христовых на апостолы. и от тех даже до нас, без пресечения по преданию святых седми вселенских соборов весь мир просвещающаго, тщится повредити. то все приводит, да приимут вернии и да повредят истинное ложным примешением. да впадут во извержение по страшному святых отец преданию. приемый крещение или жертву еретическую сам неосвящен. ничтоже бо хощет Христос общее имети с велияром. такожде же и церковь Христова, ни мало ни велико ниже аще бы точию подвигнув что кто от еретик изветом и исправления, то все буди анафема во християнех, да не повредится истинное приобщением ересей. весть бо вселукавый страшное слово Господне мир весь осуждающее, яко Духа Святаго не может прияти. яко не видит Его. тем же горе отметающимся истиннаго. и злоковарным советом святых соборы облыгающе, невложением в символ истиннаго. Его же мир не может прияти, а святии бо за истиннаго на смерть себе предаяху. да с миром осуждени не будут. Оле небрежения мирских разумов. како не ощущают вражия злоковарнаго совета, иже поставляет вражду между евангелием и святым вселенским собором. отступницы бо от святых соборов, обтицают море и сушу. ищуще да отвратят весь мир и род християнский, от святых преданий, еже церковь святым евангелием единою верою запечатле. ризу носяще истинну исткану от вышняго богословия, и справляет и славит благочестие великое таинство. ненавидяй же истинны отвращается сам от истинны, и прочих научает отвращатися от истинны точию не явно, но еще глаголют сомненно, и прикровенно и прелестно прельщаеми. а главное уже давно деется отступление от истинны. уже бо совершенно отвратишася, и мало не равняются богоубийцом июдеом да рекут горее тех по реченному: лучше бы было им не познати истинны, нежели познавше отвратитися от Истинны. О люте миру, иже не может прияти Духа истиннаго. и не точию не приемлют но и метутся глаголя. не подобает быти глаголанну аще и веруем во истиннаго [Скрижаль лист 822]. О человече воспомяни что глаголаши, доколе терпит ти Истинный, аще бо сам веруеши во Истиннаго, то кого ради сице слагаеши; по тебе сущии откуду научатся веры, разве от символа. но ныне крещаемии како глаголют без истиннаго, идеже бо несть истинны во крещении; то кий будет. явно бо глаголет Господь, яко Духа Истиннаго мир не может прияти, яко не видит Его, ниже знает Его. иже бо не приемлет в символе Истиннаго по словеси Господню. иже несть со Мною на Мя есть, иже не собирает со Мною, расточает, тем же несть мощно рещи верую но токмо в символе не приемлю. кто сие слово приимет кроме прельщенных, тии бо друг друга тешат боящеся да не от сонмища или чести мира сего изгнани будут. а истинное верующему невозможно инако исповедати, инако веровати, инако же в символе полагати. весть бо верный реченное слово, яко открывается гнев Божий с небеси на всяко нечестие и неправду человек содержащих истинну в неправде, в хуление Духа Святаго Господа истиннаго. не имать прощения ни в сий век ни в будущий. прочее вопрошаю вы изметающих от символа истиннаго. како чают, и како ждут скончания века сего, и жизни будущаго века. и паки грядущаго со славою судити живым и мертвым, его же царствию несть конца. прежде ли ждеши чаемаго страшнаго суда Христова, или инаго чего прежде суда Христова по писанию. аще речеши, яко подобает быти прежде отступлению. посем подобает явитися сыну погибели противнику превозносящуся паче всякаго глаголемаго Бога, или чтилища. и яко сести ему в церкви Божии аки богу, и показати себе яко бога во всяких знамениих и чюдесех ложных. посем того убиет Господь наш Исус Христос духом уст своих, и упразднит явлением пришествия своего по писанию. то добре рекл еси. но сему удивляюся, яко ждеши прежде отступления, ниже ищеши и небрежеши о отступлении. неужели бысть отступление, аще уже бысть то где бысть, да не прелестию уловят нас, да не впадем в сети его. да не отступим и мы от Бога с ними. да не отвратим слухи наша от Истинны, да не уклонимся к еллинским басням по писанию. люто бо сказует последних дней отступление. яко поклонятся зверю все живущии на земли. и приимут начертание на челе и на десней руце их же имена не суть написана в книгах животных. аще же ощутити отступление по благодати Христовой где бысть; и в кое время. то помысли, како подобает отступившим от веры прочих прельщати, и от веры отводити, да с собою вовлекут в вечную погибель, многими образы, и многими образы и многими разньствы, и многими ухищрении. и многими лестьми сице, яко прельстити аще возможно и избранныя, по словеси Господню. да уготовится путь врагу хотящему весь мир прельстити, и сести ему в церкви яко богу. что есть реченное, како сести ему мощно в церкви Божией аки богу, не будет бо ему мощно сести, донележе Христос в церкви пребывает. внегда же Христос из нея изыдет. тогда он своея лести распространит, не благоволит бо Христос ничтоже общее имети с велияром донележе бо не приимет человек верен догмат лукаваго от прельщенных; никако же Христос отступит от души его, ниже той смеет прикоснутися, тамо идеже Христос живет. такожде же и книги приемшия лукавыя догматы оставляются от Христа, и противный теми действует и ратует церковь Христову. да аще и едину книжицу видит супостат в церкви неповрежденну, сиречь неприемше развращеннаго догмата, не внидет тамо, дондеже изнесена будет прельщенными. опаляетбося Истинною, еже не мощи ему внити тамо идеже Христос пребывает. но сия вся действует враг со своими угодники малыми антихристы, сиречь предотечами его. его же пришествие хощет быти по действу сатанину, еже отвести от Бога весь мир лукавыми догматы, сице яко нашими же книгами нас же обличати будут. лжуще на Христа и святое евангелие. лжуще на святых апостол, лжуще на святыя вселенския соборы, лжуще на святую соборную и апостольскую церковь. а книги их тогда, точию имя соборных святых книг содержати имут. а по истинне все лукавства исполнени будут. то бо будет дело, и ныне есть лукавых предотечей, еже истребляти от книг истинну, и влагати лжи помраченную тму. и яко же рехом, всяку святыню имать повредити. наченши от веры, и крещения и священство, и знамение честнаго креста, и честных икон благоухищреннаго начертания благоискуство. и святых книг превращение ухитрит. и нравом христианским писаных и держимых по преданию святыя соборныя церкве руганием дерзнув осмеяти вся та из книг изметающе, а своя небывалая в церкви влагающе и с еретики соединяющеся, и веру их и крещение и священство приемлюще. и теми своими делы всякаго християнства по святым правилом себе лишающих, и лукавому себе присвояющих. и сице всемирной их прелести, антихристу путь устрояющих, и мнящихся быти християне, погибают в небрежении, работающе чреву и сластем мира сего ругающеся благочестивым християном, и нехотящим приимати их лукавых нововводных и богомерских прилогов, и превратов. глаголют како можете разумети неведущи многих разных языков. ниже риторства, ни философии учащеся. ваше дело приимати то, иже мы страждущем, и нам дана власть знати в словесех силу, что приимати от божественных писаний, и что отметати, да не пременится наше предприятое, донележе вси людие будут едино стадо, под единым пастырем, прежде скончания мира. егда же рекут благочестивии, яко не знаем кроме единаго, разве истиннаго Спаса нашего, Той нам есть пастырем Начальник ныне в день века, иже есть и будет. а еже глаголете вы быти исправлению прежде скончания мира. и единому пастырю, то словесем Господа нашего Исуса Христа противне. глаголет бо Господь во святом евангелии, егда приидет Сын Человеческий обрящет ли веру на земли. и яко же бе пред потопом ядяху и пияху женяхуся, и прочая [Лк. зач. 87,88]. и егда рекут мир и утверждение тогда нападет на них всегубительство [к солун. зач. 275]. прелесть бо последняя не исправлению виновна быти глаголется. но всегубительству, и от Бога отчюждению, и к сатане присвоению, яко же глаголет писание. и поклонятся зверю вси живущии на земли, их же имена не суть написана в книгах животных, но никто же от прельщенных речет, яко прельщен есть и яко прельстихся, яко Бога похулив, яко еретическую похвалив веру аще и арианин кто будет, аще македонянин, но еще и хвалится глаголя. яко християнин есть. яко благочестив, яко величаю Бога яко Христа почитаю. яко евангелию покаряюся, и апостолам повинуюся, и святых почитаю. что сия глаголы возмогут ему в день Господень имущему в вере богохулныя догматы. единою бо проглаголав лукавый догмат и возлюбив его, все христианство похулив есть и единою похулив истиннаго и пребывает держащеся хуления, како может похвалити Истиннаго. несть бо мощно от единых уст происходити хуле и хвалению. похуливый аще и хвалит во иных Бога, не приимет Бог хвалы его по реченному. всяк имеяй в себе ересь и хуление; чюждый Христа является, и всуе Христа имеет, по реченному: не всяк глаголяй Ми Господи Господи, внидет в царство небесное. но мнози услышат не вем вас. евномиева бо ересь менши всех зрится. зане во едино погружение, точию крещают со елинны осуждаются по святым правилом. а хулники на Святый Дух где явятся непрощенным бо нечестием недугуют. и несть им части ни жребия во кресте Христове, ни во смерти Его, ни в воскресении Его. отрицающиибося перваго воскресения. како второе возрадуются. блажен бо рече и свят иже имать часть в первом воскресении. на сих бо вторая смерть не имать области, и прочая: не глаголю на каникулы, не глаголю рече мы веры еретическия не приемлем, но крещения их не отторгамся. потому что крещают во имя Отца и Сына и Святаго Духа. тако же и священства хиротонию незаглажену имут. Оле безумия омраченных, како глаголете веры не приемлем, а крещения не отвращаетеся. у него же вера зла, како крещение добро может быти. такожде и священство. аще бо рече будет в дому сын мира, то почиет на нем мир ваш. ащели же ни, то к вам возвратится глаголет Господь. и всяк епископ или презвитер приемый еретическое крещение, или жертву, абие не священ. и чюжд християнства, по правилом святых отец. апостол глаголет, едино бо есть Господь, едина вера, едино крещение. тем же несть мощно обрести другаго Бога разве единаго. аще и мнози суть глаголемии бози по апостолу. но един есть Истинный. а глаголемии ложни суть вси. такожде же и вера едина есть истинная. а глаголемии ложнии суть вси. такожде и крещение едино есть истинное. аще и мнози суть крещения глаголемая, но едино есть истинное. а глаголемии яже от еретик все крещения ложни суть и чужи християнства. тако сатана вас прельстил не знати ниже взыскати истинны. Кто Бог есть разве Единаго живущаго в Сионе. кая есть вера, разве единыя положенныя в Сионе, и кое ино крещение, разве единаго истиннаго положеннаго в Сионе, и коим разумом богословия велит нам знати едино истинное крещение, а не разньством разума. всяк бо иже не знает единаго истиннаго Бога во Святой Троицы единаго Бога, еллин есть по своему злочестию. и всяк не знаяй единыя истинныя веры яже во Святую Троицу единаго Бога, еллин есть по своему злочестию. и всяк не знаяй единаго крещения, еже есть во имя Отца и Сына и Святаго Духа во едино Божество, а не в ересь не во Ариево злочестие, ни в Македониево злочестие в вере, чужд християнства. како может благочествовати в крещении. како снидет Просветитель. како послужит вода рукам вражиим. всяк бо зловерный враг есть стихиям. аще и повинул есть Господь суете тварь неволею, воздыхает и болезнует, чающе свобождения, да не работает врагом Божиим по писанию. истинным же точию другом Христовым истинно во Святую Троицу крещающим с радостию работает тварь. ащели же кий любо буди от еретик крещает глаголя во имя Отца и Сына и Святаго Духа. не верует яко Святая Троица есть Отец и Сын и Святый Дух. Бог един есть и равночестен и единосущен и сопрестолен, а не два ниже три бози яко блядословят еретицы, ариане, и македониане, и прочии. или яко новыя македониане непрощенным нечестием недугующе хулницы Святаго Духа Господа истиннаго. к таковых действу не снидет благодать, но добре глаголют святых отец правила. яко еретическое крещение несть крещение, но осквернение. и помоливыйся с еретики чюжд будет христианства. помоливыйся бо с еретики свою молитву глаголя, а не еретическую. но понеже тех молитвам приобщил есть свою молитву, и того ради отвращается Бог не точию молитвы но и християнства его, множае паче гневит Бога крещение от еретик, яко еретицы суть крещающии во злую свою веру, крестят хуляще Бога во Святой Троицы единаго. какова их есть вера мерска Богу, тако бо и крещение, нань же никогда же призрит Бог, ниже действует но яко же еллинов и июдеов отвращается Бог. такожде и священство, но мерзость запустения видяй бо враг разнословия погибель человеческую равно есть что еже от церкви отпасти и в ересь уклонитися. сице и от еретик что приемшему чюжду быти христианства не могий кого привести к себе в ересь, какову любо буди, то сам глаголет приими мя с моею ересию. и злоковарным советом. ухищряет слово яко крещенный от еретик некрещен есть, и освященный неосвящен есть. и теми злобами двема злоковарно настоит, истребити истинное крещение, и истинное священство. да лестию введет в злочестие, и ухитрити свою мерзость запустения по писанию. но горе приемлющим от злоковарных крещение, или священство. и лучше бы им не родитися, сиречь умрети во утробе матерни. прочее умолчю нежели соблазнити сим единаго от человек. а иже глаголют яко римляне яко не суть прокляти, не бе бо тогда их ереси. егда святыя соборы еретик проклинаху. да ведят вси таковии, яко римляне отступили от веры в последняя времена. близ пришествия антихристова, и кая ересь той ереси сравнится в злобе. зане вся ереси прежде бывшия ухитрил враг, да отведет от Бога верных християн в злочестие бесовы, а не сам собою, бе бо связан тогда да не льстит народов дондеже скончается 1000 лет. по скончании же 1000 лет развязан есть по писанию на мало время, да льстит паки народы. и абие искочив из бездны, отторже хоботом своим папежем римским третию часть звезд церковных. и поверже их на землю, сиречь под ноги своя, еже владети ими сице преждебывшия ереси привлачит к римской яко всем повинутися той во свое время, и быти всех ересей приятелищу невозбранну и приимати всяку ересь не истязуя крещение ни священства. токмо единаго соединения сиречь унии с римским костелом, иже есть дщерь в Вавилоне, и град сам, седящая на звери червленном, пияна кровию святых по писанию, на мало время отступление от веры в веце сем ко идолослужению и ересем. но та вся проповеданна и обличаема беяху святыми пророки. римская же прелесть отступление самем Духом Святым Господем истинным явственно проповедана всему миру. и святаго апостола Павла глаголюща сице; яко Дух явственно глаголет. яко в последняя времена отступят нецыи от веры, внемлюще духовом льстивым и учением бесовским, от истинны слух отвратят и басням уклонятися, и во умножении льстивых словес вас уловят, и прочая. тем же римское отступление и в последняя времена збывшееся, мерзейше есть Богу всех отступления прежде бывших. зане приятелище бысть всем ересем, и всем нечистотам по действу сатанину, их же приемлюще и с теми соединяющеся является ныне всех ересей источник и бездна прелести. А еже глаголют подобницы. яко не суть прокляти римляне. аще и еретицы суть, но сии глаголют не ведуще писания, ни силы Божия в них. и вся бо ереси хулят Святаго Духа явно, и без прикровения, яже мощно ощутити многим и отвратитися. А сии помраченною прелестию врази суще наши, подражают нас, присвояюще благочестивых нарицают раба быти Духа Святаго Отцу и Сыну, но исхождению Того глаголют быти от Отца, и Сына блядословят хулно. еже бо исходити Тому от Отца и Сына рабско есть. и под временем а не единосущна Отцу, еже глаголют явно хулницы суть на Святый Дух. и явно преступницы по свидетельству Сына Божия глаголюща: Дух истинный иже от Отца исходит. римляном же приемше совет лукав еже хулити Дух истинный и прилагати и от Сына. нужда им настоит от того же лукаваго совета. еже не нарицати Истиннаго, никто же бо есть Господь истинный, токмо един Творец всех тварей видимых и невидимых. яко выше рехом, хулницы не ощущают своея погибели, ни прелести вражия, дерзают противитися словесем истиннаго Бога и Спаса нашего Исуса Христа. и аще нарицают Того Бога истиннаго а небрежением Христовых словес жидове являются, а не христиане. иже бо аще разорит едину заповедей сих малых, разорит его Господь и мний наречется во царствии небеснем, сиречь тамо мучен будет, идеже будет сатана и кланяющиися ему, осуждением мучими. и се есть мний наречется во царствии небеснем. тем же аще за малую заповедь сице страшно осуждает Господь. то коими за страшную и великую заповедь, наипаче же свидетельство Господа нашего Исуса Христа. о Святом истинном Дусе иже от Отца исходит, не смей приложити и от Сына, обоя суть сия хуления на Святый Дух и непрощенное нечестие по словеси Господню. видиши ли страшное прещение, ни ли вострепещиши всеми уды своими, яко уне есть небу и земли превратитися, нежели слову Христову пременну быти, или не приемлему быти. небо рече и земля мимо идет. словеса же Моя не мимо идут. и отметаяйся Мене, и не приемляй глагол Моих имать судию слово, еже глаголах то судит ему в последний день, коего собора хощеши, или хощеши коего суда, ищеши на римское отступление указания, или не видиши яко сам Господь прежде всех святых соборов, и прежде тех отступления осудил их есть. и непрощенным нечестием удавишася преступающе словеса Господня. страшная. кая ересь дерзнула, сице востати на отметание словес Христовых. разве римская. вси бо еретики не смеяху отвращати словес Христовых. но толкованием развращенным смущающеся погибоша. римляне же явная словеса Христова отвергоша, и отвратишася еже есть Дух истинный, иже от Отца исходит, в самом главнейшем спасении, еже есть Дух истинный. отвергошася словеси Христова, а самой главнейшей погибели еретической еже и от Сына себе положиша. к сему что речем, разве прилагающим приложит Господь язвы по писаниих. а отъемлющих отъемлет Бог часть их от книг животных. в последняя бо времена последних прелестей несть мощно обличити. кроме святаго евангелия и святых апостольских словес, и сие самого токмо сущесловия, а толкования вся развращенна суть. и того ради Господь [Лк. зач. 87] бегающим в последнее время от прелести, назад неоглядываяся велит бежати, поминающе жену Лотову. егда же Того вопросиша апостоли глаголюще, где Господи. он же рече, идеже будет труп, сиречь святое евангелие, тамо соберутся и орли. о своих бо словесех Господь страшно заповедует глаголя: небо и земля мимо идут, словеса же Моя не мимо идут. и паки, не приемляй словес Моих, имать слово еже глаголах. то слово судит ему в последний день. яко Аз о себе не глаголах, но Отец посла Мя Той Мне заповедь даде. что реку и что возглаголю, всяк преступаяй учение Христово, Бога не имать по писанию. Зде зрите отступления рачители, в киих винах обретостеся. отметающеся словес Христовых, еже есть Дух истинный, иже от Отца исходит, не мози отметати Истиннаго, не мози приложити и от Сына, не отпуститбося сие нечестие, ни в сей век, ни в будущий, по словеси Господню. июдеи бо вероваху пророком приносящим заповедь от Бога Отца. нам же не пророком, но сам Сын Слово Отчее. прием от Отца заповедь, что речет к вам, и что возглаголет. страшно запрещает нам да не отметаемся реченных ниже да прилагаем умолченных, да не з жидами часть приимем. дерзающим отметати или приложити к слову Господню судит им Бог. аще бо рече пребудите в словеси Моем, воистинну ученицы Мои будите. и разуместе истинну, истинна свободит вас. тем же несть мощно быти ученику, и не разумети истину не пребывающему во словесех Господа нашего Исуса Христа.

Ему же слава со Отцем и со Святым Духом ныне и присно и во веки веком,

Аминь.

Слово 3.

Любяй вопрошает любимаго, о избрании святых отец. и како слепии видящих водят.

Понеже и вправду то по словеси Христову.

иже бо рече, аще не превзыдет правда ваша паче книжник и фарисеи.

не имаши внити в царство небесное.

и о книжном реформовании. и о 12 сатаниных учеников.

Любяй вопрошает любимаго о избрании святых глаголя: суть ли между теми иже видят слепии. еже водити видящих. он же рече, что глаголеши, о любителю, во что потребен будет слепый видящему. и что ти бысть яко глаголеши водити слепым видящих, еже от века не слыхано. той же рече, ты глаголеши возлюбленне, яко от века не слыхано, еже слепым водити видящих. аз же того ради нарицаюся християнин, да верую во Христа и слушаю словес Христовых, иже глаголет [Ин. зач. 35]: на суд Аз в мир сей приидох, да невидящии видят, а видящии слепи будут. и сего ради вопросих тя, суть ли слепии между видящими водят видящих и поучают еже знати видящим доброе и злое, и свет и тму. и разсуждати между святыми и не святыми. и между чистыми и нечистыми по словеси Господню. аще бо не будет слепым миру между видящими, то вси слепи будут по словеси Господню. и не возмогут познати пути истиннаго. но вся будут тма, и мрак во очию их. ныне бо наста время еже разсуждати между чистыми и нечистыми, между пияными и не пияных, по словеси Господню. мнози бо от святых писаша о двою пришествию Христову, а о средостению их не мнози. и того ради вооружися сатана, и сице зелне на церковь Христову, яко потопити ю в реце, юже испусти от уст своих. аще не бы дана быша ей крыле орла великаго, да парит в пустыню [Апок. гл. 12], не бы спаслася всяка плоть. о средостении сиречь между двою пришествию Христову. созда Господь церковь свою, сице крепку, сице тверду, сице непреклонну и недвижиму. яко не жидовскому злочестию, ни еллинскому мудрованию, ни еретическим прелестем, ни бесовским кознем, ни самем вратам адовым одолети ей когда по словеси Господню. яко никогда же погрешити ей, не точию в вере или крещении или священстве, но ни в малейшем от догмат святых в чем поползнутися. но цело, недвижимо, непреклонно, и непременно держати кроме всякаго предкновения, даже до страшнаго суда великаго Бога и Спаса нашего Исуса Христа Сына Божия. но враг льстяй вселенную наусти прежде своих угодников закрывати слово учения Христова, еже знати яко церкви Христовы врата адова не одолеют никогда же и ни единому исправлению ни подлежит по божественому писанию. а потом ухитри злокозненныя догматы со разных и многоразличных ересей, обличающе церковь Христову глаголя, яко поколеблеся яко погуби догматы. яко не тако прият исперва, яко не удержа цело, яко подлежит исправлению. и под образом исправления насеяша плевела многоразличныя, посреде чистыя пшеницы Христова стада. яко многим повиноватися тех безбожному учению, и от истинны слух отвратити, и к басням уклонишася, и путь истинный похуливше, яко пси лают на непорочную церковь Христову. яко бы та имела повредити себе в вере, и символ святыя веры непорочныя, и иных святых догматов; тоя же и всецелыя врата адова не одолеют вовеки, по словеси Господню. отпадших иже единства святыя веры, и от святыя соборныя и апостольския церкви. блудяще без матере и без пастыря вне церкви Христовы, на всяко лето да тыяжде себе реформотуют на горшее, яко же и прочии, прежде отпадшии еретицы. всегда учащеся, а никогда же в разум истинный приити может. но о люте мне возлюбленне, яко капля дождевная глаголется, долгим временем пробивает камень. аз же не могу тронути совести, жестокий дух да не познает смерть свою и живот в кратких сих глаголех. мощно ли церкви Христовой погрешити в чем, или прияти что блазнено, или отметнути что от божественных писаний, в евангелии по Христу глаголющу: яко созижду церковь Мою и врата адова не одолеют ей. аще мощно в чем любо буди поползнутися, или в чем погрешити от догмат святых? то всячески мощно исправлению подлежати, то и вправду от святых учителей быти той. Аще ли же ни, то ни погрешити может, ни исправлению подлежит вовеки. а мы исправлению то приглаголуем, то несть быти от церкви, но противу церкви Христовой, и от врат адовых приемлемо. сосуды различныя да ратуют церковь Христову. а себе самем реформуют на злое еже ратовати ту. а не исправляти, та бо не подлежит ни единому исправлению, но сама вся правит, и вся исправляет благодатию в ней живущаго Духа Святаго. мощно прочести и все то слово в Маргарите, о еже предста царица, да познают что есть церковь Христова, лист 509. и да познает тоя крепость и неодоление враты адовыми. и откуду навыкнем по благодати Христа истиннаго Бога нашего: что приимати нам от глаголемых учителей, и чего отвращатися; кия словеса Христова, и кая лукаваго диявола; кая церковная, и кая адская; кая спасают, и кия погубляют. его же бо церковь Христова не прият того же и не поддержала есть за мерзость его. А еже прият того вовеки не оставит, и не может быти недейственна: ни един час, и не может погрешити ни во едином слове, ни во псалмех ни во ермосах, ни во обычаех и нравех писаных и держимех. вся бо церковная свята суть, и держание не пресечеся ни на един день. Внегда же посла сатана 12 своих учеников и угодников нарицаемых изуитов сущих во одеждах овчих одеянных в габита греческаго закона, да льстят народы земли российския. тии же абие изшедше из врат адовых римскаго отступления, наченше тогда еже служити отцу своему дияволу, и до ныне не престают. от них же прежде многих в день спущающия с нами, еще онамо хвалящеся нам ругахуся, абие в российской земли возгореся огнь рачения латынских учений. и абие вознебрегошася хранити себе от ереси, глагола: у нас вся яже от премудрых ересми нарицают, не подобает нам в том последовати, и родителем нашим. и учитися от премудрых. и тако по времени без опасения начаша погибельныя сосуды учити римским богомерским ересем наводяще хулу на церковь Христову; и посем и на самого Святаго Духа Господа истиннаго, и на крещение еже от еретик собщатися; а посем книги мерзости запустения, хулящее святыя непорочныя книги словенскаго языка, начаша писати, и правыя оставляти; а потом и печатати осмелишася, за попущением властей духовных. аз же обычное глаголю не престая, аще мощно церкви погрешити в чем, то Бог послал есть и исправляющих ю. аще ли же несть мощно поколебатися ни во едином словеси, по словеси Господню, то исправлявшии не от Бога суть, но от диявола; и не исправляют, но во адово дно отводят последующих их лукавому исправлению. в сем словеси смерть и живот есть человека. о нем же аще вознебрежем, то не убежим сети вражия. кто любо буди по словеси Господа истиннаго. глаголет бо Святый истинный Дух: вем твоя дела. яко малу имаши силу, а соблюл еси слово Мое, и Аз тя соблюду от часа искушения хотящаго прийти на всю вселенную. ты же возлюбленне, како мудрствуеши о словеси сем. будет ли искушение на всю вселенную; аще ли же ни то уже есть, аз ти глаголю и засвидетельствую, яко церковь Христова не подлежит никакову исправлению. и яко онии правители искушают всю вселенную. ныне бо и мы уже плаваем в том предреченном искушении, им же искушает нас сатана. да познает кто Божий, кто егов; и кто верен, кто неверен; и кто крепок, кто малодушен; кто держит предания, кто колеблется; кто внимает от Премудрости о прелести антихристовой, и о его всепагубном пришествии; и кто отвращается его богомерских козней; и кто ему купно со жидами путь устилает богомерскими догматы, и еретическими уставы. яко ныне выходят книги еретическими реформовании, полны злых догмат, из Рима, из Парижи, из Венецыи. греческим языком: но не по древнему благочестию. их же прелагают на словенский язык, ныне же реформованныя з горшими расколы. не токмо церковь раздирающе, но и вся книги словенскаго языка. а древняго благочестия весь язык мерзяще, отягчением превратом новосмысленных. точию Бог с нами, не имут пособия от божественныя благодати. четыре бо книги новыя меняют христиане на одну старую, то Божие дело а не человеческое. и еже претят нам муками и разореньми, то не по Христе. имамы бо праведнаго солнца христолюбиваго и свята, сиречь царя.

Но да прочее взыщем от божественных писаний, что содержит средостение между двою пришествию Христову. глаголет бо Дух Святый во Откровении Богословли: аще имать кто ум, да почтет число зверя, число бо человеческо есть, и число его 666. о сем подобает нам вопросити мнимых учителей, аще от Бога суть, да явят нам тайну сию, что число зверя, и число человеческо. аще имут ум да почтут. аще ли же не почтут, то ума не имут. и несть их премудрость от небес нисходит, но земна, душевна, бесовска. яко же глаголет апостол Ияков. и велие дивно что видевше люди последуют им: веру ли, но та развращенна; дела ли, и те независтны; любовь ли, и та не ведома никому; пост ли, за щеками носа не знать; трезвение ли, всегда руки дрожат с похмелья, а без горелки ни един час, без роскоши и без рыбы ни един пяток; а труд церковный кто свидетель. но сия глаголю не иных оглаголую. не буди то, несть бо к ним ни едино слово. зане вси отступницы единообразнии суть. но от туги сердца болезную тех, иже им последуют, и зря не видят, забыв страх Божий. яко иже кого любят с тем и часть приимут, подобни суть ученицы учителем. тако же чрева ради и вас влекут, яко учители их. не довлеет мужу праведному самому токмо добру быти: но должно есть еже от благих хваление прияти по писанию. тако погубляет и злых заступление, паче же в божественных догматех. господин ада насади древо на западе, и сам напаяет, да приносит плод сладок всему миру. его же ветвие достигоша даже до востока, и красен бе и добр в снедь, иже Адама умертвивый плод. но сей еще краснее и сладостнее зрится рачителем: хвалят родителей, любят рачители, лижут чада, сосут отрочата. но блажен иже не имать чад любящих латыню. ино бо есть еже имети, а ино еже любити. зане сию любящим западная, то невозможно не токмо любити церковь, но ниже взирати на восток, когда глаголет Господь: Аз возвращу мудрыя на запад, а свет в юродство преложу. но понеже юродство не удержа своего света, двигнет Господь светилник света своего по писанию. но горе горе мнящимся летати без крыл орла великаго.

Богу нашему слава ныне и присно и вовеки веком,

Аминь.

Слово 4.

О исполнении церковном, и о связании сатаны. и паки о развязании.

Апокалипсис. Глава 20. И прииде ангел с небеси имеяй ключ бездны, и уже велико в руце своей. и ят змию древнюю, иже есть сатана и диявол. и связа его на 1000 лет. да не льстит к тому народов. дондеже скончается 1000 лет.

О блаженная 1000 лет. в ню же враг всего мира связан бе, да не льстит народов, еже боятися человек убивающих тело за слово Божие. в ню же по связании врага, абие явишася святии мученицы, за Христа кровь свою проливающе сладце даже до смерти. посем явишася престоли и седящия на них. суд дан им бысть. разве вселенския соборы. да возвеличают святых мучеников, веру и любовь. и да скажется ими многоразличная премудрость Божия, на высоких по предложению век по писанию. ныне же глагола Дух Божий, яко же во пророцех, о седмочисленном в законе: то же глагола, и по благодати седми церквам, еже есть во Асии. и понеже едину церковь созда Христос, ей же врата адова не одолеют вовеки. седмь церквей наричет писание, или явно яко седмь врат собором, на них же едину церковь по обетованию своему созда Господь, ей же врата адова не одолеют вовеки по словеси Господню. то бо есть тело Христово Премудрости Божии, еже создати себе, еже есть церковь, и утверди столп седмь, еже есть седмь святых вселенских соборов, и заклати своя жертвенная, и прочая. внегда вострубити седмому ангелу совершитися тайне Божии по писанию. и вся сия сотворити, донележе связан лежит во преисподней враг церкви Христовой по писанию. О вожделенная святая тысяща лет, в ню же враг наш умре, а мы ожихом и царствовахом со Христом 1000 лет. зде мудрость есть, тайны сия по християнех, да не отскочит за куст кто Откровения, глаголя: како имехом и царствовахом со Хриcтом тысящу лет? егда не родихомся; и ныне еже токмо хощем царствовати со Христом тысящу лет. но сию 1000 лет нарече Дух Божий первым воскресением, глаголя, яко блажен и свят иже имать часть в первом воскресении. на сих бо смерть вторая области не имать. но о сем да не смущаешися: может всяк верен часть имети в том первом воскресении, кроме отпадших истинныя веры, еже бо царствовати со Христом 1000 лет со святыми Его. несть дивно, вси бо святии воскреснуша со Христом. и от ада свобождьшеся внидоша в рай, и тамо царствоваша со Христом. почтени суще царскими престолы. сотвори бо их тогда Господь Царя, Иерея, Богу Отцу устроив, быти единородных и единомудренных. тем купно святым богоносным отцем, иже седмь крат на земли соборы святыя составльшим, имуще над собою единаго Начальника веры и Совершителя Господа Исуса. без Него же никто же от святых ничто же можаше начати, ни совершити во святых церковных догматех. но Той сам теми сиречь, на земли же и в раи сущими святыми на святых соборех действоваше, исполняя святую свою соборную и апостольскую церковь, божественными своими святыми каноны же и догматы. дондеже совершиша свою божественную соборную тайну, вострубити седмому ангелу, и яко уже не будет время. но егда воструби седмый ангел совершится тайна Божия по писанию. по скончании бо святаго вселенскаго собора, воструби со ангелом вся вселенная, яко совершися тайна Божия. проклят приложивый. проклят отъемляй от преданныя нам чистыя веры, юже прияхом от Началника веры и Совершителя Господа нашего Исуса Христа, седмию святых вселенских соборов. и блажен и свят иже имать часть в первом воскресении, над сими бо смерть вторая области не имать. имеяй же часть сея святыя веры имать часть в первом воскресении. а отторгшиися от святыя соборныя и апостольския веры же и церкви, судит Бог. а сумняйся да прочитает, како не родився Левий Мелхиседеков десятину даде, и прият благословение. и како Давыд на реце Вавилонстей плакал никогда же видевше реки Вавилонския за 40 родов. но и разбойника сподоби Господь части сея, дав ему седмочисленную молитву подобную благодати. точию да всяк християнин во всем да взирает на Начальника веры и Совершителя Исуса. аще ли же кто начнет мудрствовати о святой вере кроме сего истиннаго Учителя, истиннаго Началника веры и Совершителя Исуса, то мощно ли тому начати добре: не точию совершити. и сего ради всяк богословец начинаяй беседуя о святой вере глаголет прежде слово Христово, еже рече Господь во святом евангелии сице: егда приидет Утешитель Его же Аз послю вам от Отца Дух истинный иже от Отца исходит Той свидетельствует о Мне и прочее. и того ради Златоуст начен свою беседу о истинном Дусе, глаголет прежде от святаго евангелия яко Господь наш Исус Христос: не рече Дух Святый, но рече Истинный. яко истинен есть, и вся весть воистинну. и Того послушайте Духа Истиннаго. и Тому веруйте яко истинен есть. Киприян же святый мученик Христов глаголет о святых соборех первом и втором вселенском соборе, веру святую изложивше символ предали церкви сице. и в Духа Господа истиннаго и животворящаго. и еретика Македония препреша словом Христовым. Иустин же святый мученик Христов глаголет: яко святии отцы на втором вселенском соборе символ святыя веры изложивше предаша сице: и в Духа Святаго Господа истиннаго и животворящаго иже от Отца исходящаго. Фотий же патриарх Царя града пишет о святой вере к Михаилу князю Болгарскому о всех святых вселенских соборех, и о изрядном втором соборе, яко святии отцы символ православныя веры предаша всем верным сице: и в Духа Святаго Господа истиннаго и животворящаго иже от Отца исходящаго. А корень и источник богословии святое евангелие. И еще глаголют нецыи, яко Никон патриарх Кириловой книги не приемлет, то лгут. приемлет бо ю Никон с любовию на многих местех, и не точию Кирила приемлет, но и Стоглав приемлет, и О вере книгу приемлет, еже свидетельствует Скрижаль книга его на листах многих, лист 847, 853, 858, 859, 860. точию в вере не согласует. аще бо и сам исповедует Духа Святаго Господа истиннаго. но преступил заповедь Исуса Сирахова, и припустил к себе иноземца, иже преврати вся благочестивыя пути его, и той солга пред ним, яко святии отцы Истиннаго в символ православныя веры не вложивше, аще и Господь глаголет: яко Дух Истинный иже от Отца исходит. а он лжущаго прият паче Христова учения. в том судит Бог, кто бо рече когда прежде сего лестьца. яко святии отцы в символ православныя веры Истиннаго не прияша, или коему имя иже глаголет яко не прияша: Господу ли нашему Исусу Христу. но не буди то, Той бо глаголет яко Дух Истинный от Отца исходит, человеком ли. никако же. волнуетжеся аки море от многих ветров. того ради слова еже глаголют кождо в сердцы имеет яко неприяша. лучше бы и нужнее святым положити в символ Господа Истиннаго, нежели в сердцы имуще сие себе точию спасает, а символ предающе без Истиннаго, весь мир погубляют. егда крещают глаголя символ без Истиннаго, то како приидет Истинный в сердце крещаемаго. О горе хулником на Святый Дух, им же не отпустится сие нечестие ни в сий век ни в будущий по словеси Господню. вопрошаю ненавидящих в символе Господа истиннаго. како святии отцы соборы составляху забыв Господа рекшаго, яко без Мене не можете творити ничто же. да не будет. ни ли сам Господь бе с ними на святых соборех начинаяй невидимо всяку богословию от святаго евангелия своего. еже предлагашеся посреде коегождо собора вместо самого Христа Господа истиннаго их, без Него ничто же можаху сотворити, по словеси Господню и яко преступоваемо слово Христово не имети Бога, и не быти христианом по писанию. где правда яко не прияша или мниши яко святии отцы тако вероваху во Христа, яко не послушати словес Его. не буди то, яко нецыи монахове пишут о символе православныя веры, а Истиннаго воспомянути бояхуся и не точию, но Христова имени и святаго евангелия воспомянути, да не обличит их совесть истребляти от символа Истиннаго. Скрижаль лист 818, 830, 835, 839. а монахове Максим премудрый, Зиновий премудрый, Нил премудрый. а веру их Бог весть, прочее, понеже есть мы недостойни общаго собора. то станите убо вы сами, кто любо буди от вас во образех святых отец втораго вселенскаго собора противу еретика Македония глаголюща, тварь Духа Святаго, а не Господа Истиннаго. мощно ли будет вам составити честь и славу Творца своего Святаго Духа не нарекши Того Бога Истиннаго и препрети того еретика кроме святаго евангелия. наипаче же видяще того самем Господем нашим Исусом Христом во святом евангелии нареченна Дух Истинный иже от Отца исходит. аще вам будет мощно воистинну, то и святым было мощно. то не лжите на святых всех райских жителей. не станет бо вас с тех налагати им безчестие. наипаче же еже хулником быти вам на Святаго Духа Господа Истиннаго. и в непрощенном нечестии скончатися смело дерзаете. но на пользу вам. узрите бо символ православныя веры согласен со святым евангелием в день суда Христова, а не без истиннаго, яко ныне мудрствуете небрегуще о страшном словеси Святаго Духа явственно глаголет, яко в последняя времена отступят нецыи от веры, внемлюще духовом льстивым, и поклонятся зверю, ему же дана будут уста хуления, хулити имя Господне и Духа Истиннаго, иже явственно глаголет Павлом о последних временах; и яко всяк грех и всяка хула отпустится человеком кающимся, а на Святаго Духа слово едино рекшим не отпустится ни в сий век ни в будущий. сия глаголя засвидетельствуя небом и землею, яко сие нечестие не подлежит покаянию ни слезам, ниже мученической крови. уста бо Господня глаголаша сия. а прелесть не приходит явным наветом, но прикрывше наготу свою, да не познают козней ея прельщаемии, иже не имут бисера. и иже никто же может разлучити верна от любви Истиннаго: ни смерть ни живот, ни ангели ни иная кая тварь, точию душу свою положити зань. его же аще кто зле ищет, никако же да обрящет. мир бо рече Господь, Духа Истиннаго не может прияти, яко не видит ниже знает Его. вернии же знают Его яко Истинный есть.

Ему же слава ныне и присно и вовеки веком,

аминь.

Слово 5.

О прелести антихристовой и о предтечех его последних времен.

како сатана мудрствует своими угодниками.

Яко не глаголати им явно на Святый Дух лаяния хульна, сокрывати яд смертоносный.

еже есть истинна в неправде.

Всяк християнин верует во Христа Сына Божия, всяк веруяй взыскует учения Христова и заповеди Его. всяк взыскуяй блюдет себе от преступления заповедей учения Христова, воспоминая словеса сия Богословля, иже глаголет: яко всяк преступаяй и не пребываяй во учении Христове, сей не имать Отца и Сына и Святаго Духа. аще кто грядет к вам, а сего учения не приносит, не приемлете его в дом, и радоватися не глаголите: глаголяй бо ему радоватися, сообщается вере и делом его злым. что страшнее быти сего может, в сем веце и в будущем, яко преступления ради единаго словеси, не имети Бога, и сочетанну быти еллином. но несть дивно, страшно бо страшно и запрещение приемлет: небо рече и земля мимо идут а словеса Моя не мимо идут, глаголет Господь. тем же унее есть небу и земли прейти, и скончатися, нежели единому от словес Христовых неприяту во християнех быти. два запрещения изыде от уст Господа нашего Исуса Христа. иже рече несть со Мною на Мя есть, иже не собирает со Мною расточает. что есть еже быти со Христом. разве еже учитися от Христа. а не хотящему от Него учитися, на Него ополчается. нужда есть, иже бо рече, несть со Мною на Мя есть а иже не собирает со Мною той расточает. что реченное иже не собирает расточает; разве учение от Христа собрати в сердце. учение Христово не быти путем, да семя позоблют птицы, не быти каменем, да увянет, не быти тернием, да подавит его. но быти благой земли, да возрастет в сердце, да сотворит плод по словеси Господню. сего ради глаголю вам: всяк грех и хула отпустится человеком, а еже на Святый Дух хула не отпустится человеком. иже бо речет слово на Сына человеческаго отпустится, а иже речет на Святаго Духа, не отпустится ему ни в сий век ни в будущий глаголет Господь. что есть не отпустится, сего ради разве иже рече. иже несть со Мною на Мя есть, и иже не собирает со Мною расточает. сиречь еже рехом отпустится егда восплачется горько яко Петр. а еже рехом не отпустится ни в сий век ни в будущий, уста бо Моя глаголют, сия глаголет Господь. аще веруете в Мя, блюдите крепко словеса Моя. аще же отмещитеся словес Моих то ни Мене знаете, ни Аз вас. или сотворите древо добро и плод его добр. или сотворите древо зло, и плод его зол. сиречь аще веруете яко от Бога изыдох и приидох в мир. то веруйте и словесем Моим, словеса бо Моя плод суть, а отметаяйся Мене и не приемляй словес Моих, имать судию слово еже рекох, то слово судит ему в последний день глаголет Господь. аще бо веруем во Христа, чесо ради веруем, разве еже умрети за слово Его. аще же веруем точию во глаголемых, а в сердцы словеса Христова не вкореняем, еже умрети за слово Его, то несть мы християне еже бо веровати во Христа, яко Бог есть и Сын Бога живаго. сие похваляет апостол, но глаголет, яко и бесове такожде веруют и трепещут. но повиноватися учению Христову не хотят. и того ради бесове суть, нам же не буди в вере бесом наследовати, еже во глаголех токмо веровати, а учения и словес Христовых отвращатися. един бо есть суд обоим отметающимся, яко же самого Христа. тако и словес Христовых по словеси Господню. отметаяйся Мене и не приемляй словес Моих имать судию слово, еже глаголах то слово судит ему в последний день глаголет Господь. иже бо речет слово на Сына Человеческаго отпустится ему, а иже речет на Святаго Духа не отпустится ему, ни в сий век ни в будущий, по словеси Господню. что реченное от уст Господа нашего Исуса Христа. сице страшно, яко не отпустится ни в сий век ни в будущий по словеси Господню, аще кто слово речет на Святаго Духа не отпустится ни в сий век ни в будущий по словеси Господню. естьли кто на земли и во всей подсолнечной могий разрешити соуз сей, и не токмо на земли но ниже на небеси кто от твари разрешити может. сице страшное запрещение, всяк бо грех и всяка хула подлежит покаянию и оставлению, а сие непрощенное нечестие никакову покаянию ни прощению не подлежит ни в сем веце ни в будущем по словеси великаго и истиннаго Бога и Спаса нашего Исуса Христа Сына Божия. кто в Него верует, то и словеси сему верует . и кто Ему самому ругается, той и словеси Его. сие кто дерзнет под свое пияное разсуждение полагати, но яко же Бог поругаем не бывает по писанию, тако и слово сие страшное неизменно пребудет вовеки. того бо ради Господь предзапрещает сице страшно, да никто же помыслит впасти в сие непрощенное нечестие, еже рещи слово на Святый Истинный (Дух). посем сам Дух Святый явственно над главами апостол своих глагола. о Нем же Павел вопиет глаголя: яко Дух явственно глаголет, яко в последняя времена , отступят нецыи от веры внемлюще духовом льстивым, и учением бесовским, и прочее. се глаголет Дух Святый отступят нецыи, а не вси. поискать бы их неужели обретается где отступльшии от веры. их же никто же от развращенных познати может, кроме единаго стада Христова, а развращеннии внемлют учением бесовским по словеси Господню. како познати могут отступление, и в дому своем, не токмо где далече. но едино дерзают приемше хуление на Святый Дух, яко тому не отпустится, иже не покается. а страшнаго и всяк ум превосходящаго словесе Господня забывают. еже како может принести покаяние к тому иже предглагола прежде окаяннаго того покаяния свой страшный суд Судия праведный глагола: аще кто речет слово на Святый Дух не отпустится ему ни в сий век ни в будущий. или мниши яко может произыти прощение, или оставление кроме уст Христовых, да не будет. сам бо глаголет Христос истинный Бог наш [Иоан. зач. 36], яко Аз есмь дверь, Мною аще кто внидет спасется. и внидет и изыдет и пажить обрящет. а не входяй дверми но пролазя инуде, той тать есть и разбойник. еже бо сам Творец небу и земли запечатле, вскую прелазя инуде, ища суетнаго покаяния, или оставления. святое бо покаяние именуется и есть сие, еже подлежит прощению. грех или хула, а за хуление на Святый Дух аще и мученически скончается не оставит. но прежде сего непрощеннаго нечестия блюдися всякаго греха, и всякия геены огненныя, да не речеши слово на Святый Дух. зане Той един есть Дух Истинный, и Тем единем вся тварь видимая и невидимая живут и движутся. сиречь ходят дышут, плавают обращаются, яко вси горне умныя силы небесныя. и вси человецы, и вси скоти польския, и вси звери дубравнии. и вси птицы небесныя, и вси рыбы морския и вси гади движущияся, их сотвори Господь Бог Святая Троица. вси Духом тем истинным живут и движутся. и того ради Господь наш Исус Христос Творец небу и земли, нарече Того во святой божественной богословии Дух Истинный. никто же ин токмо Той един, аще бо и наречет кто кого истинным, но той глаголемый истинный создан есть от Истиннаго, и не сам собою живет, не сам собою дышет, не сам собою ходит, не сам собою глаголет, не сам работает, не сам движется. но вся та действует в нем Дух Истинный иже воистинну истинен есть, и ни от кого не создан ни сотворен но сам собою живет, и всем тварем Творец и Создатель. и того ради крайне честнейшаго наречения нарече Того равночестный истинный Господь наш Исус Христос глаголя, яко Дух Истинный иже от Отца исходит, являя величество Святыя Троицы Отца и Сына и Святаго Духа. яко научи святых своих учеников и апостолов богословити о Святой Троице: яко Отец Бог истинный есть, и Сын Бог истинный есть, и Дух Святый Бог истинный есть. о Нем же первозванный апостол Христов Андрей уча сея святыя веры весь язык греческий и весь язык словенский, и во ахайских странах мучим сый смертию на муках запечатле сию святую богословию глаголя ко учеником своим иереом и диаконом, и всему собору. веруйте во единаго Бога Отца, Бога истиннаго, и Сына Бога истиннаго, и Духа Святаго Бога истиннаго. а иереи и диякони, ахайских стран, во весь мир. сиречь на восток и запад, и на север, и на юг разсылаху послания о сей святой вере, и о смерти святаго апостола Андрея. и яко от него научишася сея святыя веры, многа же к нам учения Господа нашего Исуса Христа. яко ко исправлению жития нашего и дел наших, от них же аще и погрешим в чем и возрыдаем кающеся, прощению сподобляемся. и о неизреченнем величестве Святаго Духа богословия страшна, еже есть Дух истинный иже от Отца исходит два слова, но от уст великаго Бога. ино бо нам есть глаголати о твари создания Божия еже есть небо и земля море, и вся живущая в них, и ино есть еже глаголати о законе и заповедех и учениих Господних, яже к нам что суть сия вся инако стоят. и чесо ради и что есть начало жития нашего. и что конец, и что терпение наше, и что венец терпению. а ино есть богословити нам о самом том Тварце и Создателе всех тварей видимых и невидимых, и наипаче же о самом сице сотворшем нас. еже кто Бог наш, и како имя Его, величествию бо Его несть конца. а имя Его Господь, Той един есть Вышний по всей земли, Той нам проглагола о всех сих Сыном своим Господем нашим Исус Христом нарекшим себе самого дверию глагола [Иоан. зач. 36]: Аз есмь дверь. Мною аще кто внидет спасется; внидет и изыдет и пажить обрящет. тать не приходит разве да украдет и убиет и погубит. паки, а входяй дверми пастырь есть овцам. но понеже воистинну истинная есть дверь истинный Христос Бог наш, то слыши небо и внуши земле глаголы сия како пред лицем Тоя истинныя двери пролазят инуде ругатели. а стыдятся нарещи себе татьми и разбойниками. дверь бо глаголет яко Дух Истинный иже от Отца исходит, а они проломавше диру инуде приложиша. и паки дверь глаголет, Дух Истинный. а они проломавше диру инуде истребиша истиннаго от символа православныя веры. и паки видяще яко церковь держится, истинныя двери Христа своего Бога, и им не последует. а они умудрившеся негде дерзают глаголати яко святии отцы на втором вселенском соборе мимо дверь Христа своего проломаша диру сию и тою лжею ухищряти отвратити верных от истинныя двери Христа Сына Божия, да прелазят инуду да совокупятся во едино совокупление сиречь в римскую унею. та бо воспалившеся в римском отступлении и доныне не угасает еже хулити Духа Истиннаго последующе прадеду своему Македонию. О христолюбцы разсудити истину со лжею, воспомянувше яко умрети имамы. и воставше пред страшным и праведным Судиею стати имамы, и принести веру. како веровахом, от кого научихомся коею дверию внидохом. и согласно ли сердце со усты нашими. внидет бо рече Господь, и изыдет. сиречь верует и исповедует той пажить обрящет. а не входяй дверми, но пролазя инуде, тать есть и разбойник. всяк грех и всяка хула отпустится человеком, кроме хулы яже на Святый Дух глаголет Господь, на Святаго же Духа не отпустится ему, ни в сий век ни в будущий. откуду нам израсте вера разве от уст Христовых, и та суть двери нашея веры. аще держимся двери, овца есмы Христовы. аще ли пролазим инуде, татие есмы и разбойницы, по словеси Господню. не мози приклонити ухо во лжу хуления на Святый Дух. но ничто же бо отступи от святых когда, от святыя истинныя двери Христа Бога Сына Божия. и не токмо не отступи. но аще бы и ангели благовестили. аше бы и апостоли проповедали несогласно со Христом истинным Учителем истинною дверию святыя богословии. анафема да будет. се глас Христов, се евангельский, се святыя соборныя и апостольския церкви. паки вопрошаю откуду нам вера израсте. разве от уст Христовых. кореня ли отторгшеся возмнимся процвести. да не будет. Аз бо есмь лоза, а вы рождие, яко же бо розга не сотворит плода. аще не пребудет на лозе но изсыхает и во огнь вметаема бывает. тако и вы аще не пребудете в словеси Моем, яко без Мене ничто же можете творити. и всяк иже не пребудет во Мне, и в Моих словесех извержется вон, яко же розга [Иоан. зач. 50]. сия словеса глаголет Господь наш Исус Христос Сын Бога живаго. кто не убоится и от верующих вонь. неверных же иже отторгшеся от лозы истинныя извержени вонь и иссыхают, мимо дверь истинную пролазят инуде. прилагающе и от Сына изметающе Истиннаго и облыгающе совет святых о них же Дух Святый прорече усты Давыдовы прорече глаголя. в советех правых, и в сонме, велия дела Господня. изыскана во всех волях его. и паки Бог прославляем в советех святых. зри яко прославляем в советех святых, а не без Истиннаго яко лжите на святых. глаголя, яко святии Истиннаго в символе святыя веры не прияша. аще и Христос рече яко Дух Истинный иже от Отца исходит. видите ли незавидно премудрии, яко мало вам еще изгоняти церковь яже на земли но и в раи сущую гоните, бестудно глаголя, яко мимо лозу истинную Христа своего, проломаша диру. и неприяша в символ святыя веры Истиннаго. тии же вси святых соборы, со всеми святыми райскими жительми согласно и единодушно вопиют к Богу на нас глаголя. доколе Святый Истинный не судиши и не мстиши своего си хуления, и нашего оболгания. а ко Пресвятой вопиют Богородице глаголя, радуйся Царице небесных сил яко мучителей немилостивых изметаеши от начальства подая гонимым отдохновение. мы же паки восприимем богословию о истинной двери Христе Исусе Истинном Бозе нашем, како сказует истинную богословию. еже бо глаголет писание, яко будут вси учении Богом. се учит Бог Дух Истинный, иже от Отца исходит. яко же бо Сын Божий, Бог истинный иже от Отца истинна рожденна а не сотворенна есть. и того ради глаголет божественный Златоуст: не рече Христос Господь Духа Святаго но нарече Истинный яко истинен есть. и вся глубины Отча и Сыновня весть воистинну, яко един Бог и Господь истинный со Отцем и Сыном споклоняем и славим безначально и безконечно. сие титло Святей Троице свойственно есть и равночестно, яко же Бог Отец истинный есть, тако и Дух Святый Бог истинный есть, Его же аще наречеши Бога или Господа а не приложиши Истиннаго, то ничто же рекл еси о величестве славы Его. яко мнози бози и господие глаголются на небеси и на земли по писанию. и того ради Бог Истинный есть нарече равночестнаго Духом Истинным, иже от Отца исходит, се дверь истинная богословии глаголет. а не входяй тою во святую веру, но пролазя инуде, тать есть и разбойник, се лоза истинная. на ней же аще кто и не держащеся тоя учения и богословия яко розга изсыхает отторгшеся лозы истинныя. кто не готов умрети за Христа, то како умрет за слово Его. унее бо есть исторгнути душю от телесе нежели Истиннаго от символа святыя веры, уста бо Господня глаголаша сия. аще кто глаголется быти християнин, а словеса Христова пресевает. сиречь еже хощет приемлет, а еже хощет отметает в беседе сей да творит еже хощет. донележе ему Бог терпит, ведый яко стати имать пред страшным и праведным Судиею Христом.

Ему же слава со безначалным Его Отцем и со Пресвятым и благим, и животворящим Духом,

ныне и присно и вовеки веком,

Аминь.

Слово 6.

О Премудрости Божии,

яже созда себе храм, и утверди столпов седмь.

Блаженный и праведный Давыд царь же и пророк благодарно вопиет ко Господу глаголя. безвестная и тайная премудрости Твоея явил ми еси. и паки яко возвеличишася дела Твоя Господи, и вся премудростию сотворил еси. О премудрость, где еси, и где живеши, яко тобою вся сотворил есть Бог. и без тебе ничтоже бысть, еже бысть по писанию, и в символе православныя веры, великаго в царех Соломона испросих от Бога премудрость яже бе тогда з Богом, егда сотвори Бог небо и землю, и море и вся яже в них, и егда сотвори перваго человека, и постави его в раи и по отпадении не остави его да не погибнет. Егда же прият великий сею и премудрый Соломон от Бога премудрость громогласно возгреме во всю вселенную глаголя яко премудрость созда себе храм, и утверди столп седмь и закла своя жертвенная, и черпа в чаши своей вино. и уготова свою трапезу, и посла своя рабы созывающе с высоким проповеданием на чашу глаголющу иже есть безумен, да уклонится ко мне и требующим ума рече приидите и ядите Мой хлеб и пийте вино, еже черпах вам, и прочая. Кто сия премудрость разве Господь наш Исус Христос Сын Бога живаго, иже нарече сам себе дверию глаголя. Аз есмь дверь, Мною аще кто внидет спасется. внидет и изыдет и пажить обрящет. и паки, не входяй дверми во двор овчий, но прелазяй инуде, той тать есть и разбойник, и прочая. И понеже премудрость Божия Господь наш Исус Христос истинная дверь сый, не припустит ко церкви чюжаго учения яже созда разве своего си учения. дверь во двор овчий иже есть церковь, а пролазяй инуде. тать есть и разбойник, по словеси Господню. Но что есть седмочисленное столпов, их же утверди Премудрость в храме своем; и что закла своя жертвенная. и что есть черпа в чаши своей вино. Зане в ветхом завете сих не обретаем, но обретаем я во благодати Господа нашего Исуса Христа в новом завете седмочисленное седми вселенских соборов, ими же Христос Премудрость Божия созда себе храм сиречь святую и апостольскую церковь, яко же храм не может стояти не бе имея столпов цело стоящим. тако не может быти соборная и апостольская церковь. аще не бы ея Господь утверждал седмию святыми вселенскими соборы. И та суть седмь столпов, и утверди во своем храме Премудрость Божия Господь наш Исус Христос Сын Бога живаго. А еже отступницы отступивше от святых преданий и канонов обличаеми седмочисленными проображеньми же и пророчествы составиша своя столпы но не тверды без множайших бо от седми сокраментов их спастися не мощно всякому человеку, негли во святой соборной и апостольской церкви, несть мощно быти ни житию ни християнину отступивше не токмо единаго от седми святых вселенских соборов, но аще бы и мало что от преданий святых кто любо буди отверг, а по Златоусту, аще бы и худое что подвигнул анафема да будет, что может худое в церкви быти. Но отсецая дерзость в людех сия проглагола святый сиречь аще что возмнится человеку быти худо во святых преданиих, да не дерзай, да не будеши анафема по писанию вся бо ереси от продерзателних толкований воспали враг. Аще не удержимся истинныя лозы истиннаго Учителя словес Христа Бога нашего, то всяко погибнем. Тем же всяк верен прочти паки от начала зде глаголанная. яко вся Премудростию сотворил есть Бог. яко Той созда себе храм, и утверди столп седмь и прочая, и яко сия Премудрость есть, Господь наш Исус Христос Сын Бога живаго. Яко Той созда церковь свою на седми святых вселенских соборех. и того ради соборная именуется, и есть, и яко Той и дверь истиннаго християнства. А не входяй дверми тать есть и разбойник, яко Той есть лоза истинная на ней же аще кто не пребудет и извержется вон, и изсыхает и во огнь вметаема бывает, и изгорает. и прочая, зри со вниманием како церковь Христова пропущающи всякаго верна сквозе символ святыя веры вопиет глаголя двери двери Премудростию вонмем, и се есть внидет и изыдет, и пажить обрящет, сиречь, аще дверию внидет слова Христова, и аще не отторгнется от лозы учения Христова. аще проидет сквозе весь символ премудростию слова Христова. аще не приидет от инуде ни единыя точки. тогда проидет Премудростию, и дверию Христом внидет и изыдет и пажить обрящет. сиречь не токмо сам душу и сердце свое ощутит исполнено радости, яко внидет изыдет дверию сию внемлюще Премудростию двери. но и прочим возвестит пасущеся с ними на пажити учения словес Христовых, яко несть мощно нарещи святаго символа. точию догмат святаго евангелия. но сие верным радость есть, а отступником мозоль. Двери двери Премудростию вонмем. Се паки открывает нам Премудрость Божия прочия двери, яже в тысящу лет. юже нарече Дух Божий первым воскресением. егда сатана бе связан. блажен и свят иже имать часть в первом воскресении. на сих бо вторая смерть обладати не имать, како имети часть за 1000 лет тоя тысящи имущим или по той тысящи в тысящу лет родившимся аще не Премудростию вонмем, аще не дверию внидем. како дверию изыдем, всяк бо хотяй имети часть в первом воскресении, должен есть взыскати. Како внити верою во оную тысящу лет, и како изыти и пажить обрести, и кая нам потреба проходити учащеся яже в ней события. и что есть первое воскресение. и что часть наша в нем; но сих всех никто же весть улучити. аще не церковною Премудростию яже вопием, двери двери Премудростию вонмем. Всякой бо святыни, яже во святых догматех корень и источник святое евангелие верующим. а пролазя инуде тать есть и разбойник по словеси Господню. Тем же взыщем, коея ради вины сатана связан бе на 1000 лет да не льстит языки, и паки по 1000 летех развязану быти да льстит языки по писанию. разве да не препнется проповедь воскресения Христова. Зане яко той льсти мудрец возмутил бы весь мир. да нигде же воспомянется имя Распятаго, како было мощно быти царем благоверным, како вселенским собором. како на соборех исполнитися церкви святых канонов, и догматов всем крыющимся, всем бегающим по горам пустыням неисходно. И связану бо сущу тому како от бесовских князей гонима бе церковь Христова. Всякому негли ведати мощно есть, како пролияша крови святых мученик в трисотныя лета по страстех Господних. всяко аще не бы той сам связан бе, не бы спаслася всяка плоть, вселукаваго ради коварства козни его. Егда бо бе не бе связан, како Адама прелестию рая лиши, како по изгнании Каина наусти на убийство братнее, како всех людей от Бога отведе да потопит беззаконием весь мир, кроме Ноя праведнаго. како наусти ко столпотворению, како ко идолослужению до Авраама и Содоме, и во Египте и по пустыни, и во царех даже до пришествия Христова. Зде зри, како пришед Христос колика знамения и чюдеса сотвори пред ученики своими, яко ни всему миру вместити писати в книги, их же всех самовидцы бывше святии апостоли. А во время страстей Господних вси разбегошася страха ради июдейска по действу сатанину. И того ради связан бе сатана на 1000 лет, да не льстит чрез меру силы человеческия. Иже бо и самому Господу постящуся, 40 дний, дерзнув приступити с прелестию. и во мгновение ока показа вся царствия мира, и хулными глаголы. како не бы повредил проповеди, не связан сый. И того ради связа Господь за немощь естества нашего, на 1000 лет, да не льстит народов, еже убивающих тело, яко да никто же Христа ради благоволит умрети по словеси Господню еже рече Господь. иже Мене ради аще кто погубит душю свою и евангелия, той спасет ю, и первии будут последнии, а последнии первии. Тем же нужда нам настоит внити в сию тысящу, дверию словес Христовых. и соглядати бывшая в ней от начала даже до конца ея, да навыкнем. чесо ради нарече ея Дух Божий первым воскресением, и како блажен и свят иже имать часть в сем первом воскресении. Сия вся аще вонмем премудростию словес Христовых, то всячески внидем и изыдем и пажить обрящем по словеси Господню, в начале бе тогда святыя тысящи лет, Христос воскресе из мертвых, смертию своею нашу смерть попра, и сущим во гробех живот дарова, и всех святых душа со Адамом от ада свобождь в рай всели, и многих верных телеса воскреси сподобляя прияти святое крещение. да омывши греси внидут в рай, и тако по воскресении поживе Господь 40 дний на земли, являя себе учеником своим. посем вознесеся на небеса, и седе одесную Бога Отца. и посем в день пятидесятный Духа Святаго благодать прием от Отца излия на святыя своя ученики и апостолы, сице да и тии во время страстей Господних разбегошася страха ради июдейска, а ныне по сошествии Святаго Духа, смерть Христа ради паче живота и мучение, паче меда и сота им являшеся, и дванадесят токмо с тощима рукама яко овцы посреде волков многих на всю вселенную ополчившеся и не книжни суще. на вси полки бесовския и философския небоязненно дерзаху. и прочая, двери двери Премудростию вонмем. Како седмочисленное столпов единство имут, сиречь едину веру, едину церковь, едино крещение, едино священство, едино мудрование, и едину крепость. а не тако яко римскаго отступления сокрамент, иже отступивше седмочисленнаго семи вселенских соборов, и символ святыя веры седмочислен во святых догматех, на 12 артикулов разложивше, и под ногами 12 икон воображают неправедно. Седми бо святым собором равно часть во святом символе, да никто же речет, яко двема соборы начат и совершен есть. Кроме бо прочих какова часть первому в седмом такова часть и седмому в первом. Зане вси святии седмь вселенских собор, в начале собора полагаху святое евангелие на месте Христове, и прочетше символ святыя веры, и добре разсмотривше. яко единодушнии Бога и святыя веры, яко свят и непорочен целующе на главах своих полагаху глаголюще. проклят приложивый, и проклят отъемляй. Сия вера святая, сия вера евангельская, от небес к нам сошедшая. Посем прочия святыя догматы составляху имуще началника и учителя и наставнику себе святое евангелие, и тако единство седмочисленно есть святых соборов, и седмочисленное едино есть, яко сердце всего исполнения церковнаго от Адама даже до втораго пришествия Христова. содержит вся святыя веры, каноны же и догматы, и яко первому человеку Адаму часть в последнем от спасаемых, тако и последнему в первом Адаме. Вера бо святая соборная сице соединяет церковь Христову. Но сия вся познаваем, аще Премудростию вонмем при апостолех бо церковь аще и не возрасте нарицатися соборная, яко еще не соверши ея тогда Господь по своему обетованию еже рече, созижду церковь Мою и врата адова не одолеют ей, но совершенну положи в ней, тако всем яко тогда верным имети душу едину, и сердце едино во многих тысящах. Но что дивно, яко двум тысящам святых седмь вселенских соборов душу и сердце имети едино. Христос бо тако зиждет церковь свою всякаго разума. яко в той тысящи лет егда сатана бе связан, всей церкви соборной и апостольской имети душу едину, и сердце едино. И се есть реченное, яко Премудрость созда себе храм, и утверди столп седмь, и прочая. Аще же кому зрится сие слово скудно то ко мне старцу прииди я доложу скудость всякому любящему в символе Истиннаго. а враждующему на Истиннаго несть во мне части ни жребия ни в чем прочее уже время настоит нам дверию внити во святый символ православныя веры. Яко содержит в себе седмь артикулов. по числу святых седми вселенских соборов, а не 12, яко отпадшии мудрствуют, борюще седмочисленное святых седмь вселенских соборов. Кождо бо состав от седми соборов святаго символа, сораслен и сочислен есть. коемуждо от седми святых вселенских соборов. Аще и книги о сем в Риме сожжении, но оста нам во псалмопении Давыдовым глаголя: руце Твои сотвористе мя. аще и яко от человек от отца, иже есть рожден. по многих летех, а не отрещися Адама. И паки на реце вавилонстей ту седохом и плакахом. не суще событию за 14 родов. о пречюдный Давыде крестообразно состояти сия изображати нам единою бо рукою досязаеши до преселения вавилонскаго за 14 родов по тебе не сущу событию. Или како Левий, не рожден сый за многа лет десятину даде Мелхиседекови, и благословение прият, тако Бог соединяет веру святых своих первых с последними, а последних с первыми во едино да будут вси едино по словеси Господню. И се есть едина святая соборная и апостольская церковь юже созда Господь на камени исповедания своего. а не на Петре, яко Рим верует неправе, сия есть тело Христово, сия есть, ей же душа седмь святых соборов. сия есть, ей же сердце символ православныя веры. сия есть ей же двери сам Христос, сия есть ей же лоза сам Христос [беседы лист 1459]. Мощно ли телу не повиноватися главе своей Христу. мощно ли души растояти от тела противу главы. мощно ли сердцу не согласовати главе своей Христу. мощно ли отторгшеся лозы своея не погибнути вконец. мощно ли тамо своею дверию Христа прелезти инуде, а не быти татю и разбойнику. Оле несмысленнаго нерадения. оле беснования вина исполненнаго и сикиру. оле забвения еже стояти пред страшным судиею Христом, и принести веру жительства и дела своя, и дати ответ во всем. и не будет избавляяй, Христос есть дверь истинная. а ты инуде пролазиши. Христос велит слушати евангелия, а ты слушаеши давно запрещенных харатейных книг, Христос велит глаголати, Дух Истинный, а ты не токмо хощеши глаголати Истинный, но ибо решися со Христом и изметаеши Истиннаго. забыв яко жестоко Македонию противу рожну пратися святаго евангелия еже есть дверь истинная, а пролазя инуде, сиречь харатейными книгами. Знай свое имя по словеси Господню, мы же приходяще и соглядая 1000 лет, в ню же сатана связан бе. воспомянухом отчасти бываемая в ней, но яко по седмом вселенском соборе, и царство сатанино начат утвержатися, паки на западе и брани с востоком воздвизахуся, и самое отступление от евангельския проповеди в лукавых сердцах возгарашеся. А по скончании 1000 лет, егда развязан сатана, да паки льстит человеческое естество чрез меру. яко аще не Господь поможет, то всех поглотити ему, аще возможно будет и избранных. И абие искочивши из бездны. отторже хоботом своим третию часть звезд небесных, и поверже на землю, и изгоняше жену, яже есть церковь и прочая. и даде зверю седмоглавному силу свою и престол свой, и власть великую, и прочая. Нам же время паки воспомянути истиннаго учителя Христа, и всяк кто не пребудет во учении Его Бога не имать, кто противу станет, и паки воспомянути истинную лозу Христа. от нея же всяк отторгшеся изсохнет и изгорит глаголет Господь, кто противу станет. И паки воспомянути истинную дверь Христа. а пролазя инуде тать есть и разбойник, кто противу станет, и паки небо и земля мимо идут, а словеса Христова не мимо идут. Кто противу станет кроме непрощеннаго нечестия. Иже глаголют яко святыя соборы словеси Христова не приимаху. рече Господь яко Дух Истинный иже от Отца исходит. Кий собор сего словеси не приимет, или кий возненавидит о непостижимом величестве. яже от Отца исходит. Аще бы и ангел с небеси сошед не хотел сего словеси великаго, Бога о великом Бозе приимати, был бы анафема от церкви Христовой. Наипаче же яко не оставитися сему нечестию, ни в сем веце, ни в будущем, по словеси великаго Бога и Спаса нашего Исуса Христа. Где у вас очи, где разум; где душа, тварь ли еси, сего великаго Бога; Его же слово отмещеши, помяни Адама, едино слово Божие преступивше, и толико лет тысящь в мучительстве претерпевши. Но тому не рече Бог, аще снесте яко не оставится. и того ради помилован бысть, и рай паки наследова. Вам же отметающим словес великаго Бога, и хулящим на Святаго Духа, равночестна великаго Бога, запрещенное, непрощенное ни в сем веце ни в будущем. Аще ти Христос отказал есть, кто простит ти; или кто приимет тя; твори еже хощеши. Но страшно впасти в руки Бога жива, но мы воспомянувше сия страшныя глаголы Господня, и отметающихся в погибели, проходим дверию а не инуде святый символ святыя веры, воскликнем превысокий глас церковный, глаголя. двери двери Премудростию вонмем, и сице глаголя:

[1] Верую во единаго Бога Отца Вседержителя Творца небу и земли видимым же всем и невидимым. [2] и во единаго Господа Исуса Христа Сына Божия, и единороднаго иже от Отца рожденнаго прежде всех век. света от света, Бога истинна от Бога истинна рожденна а не сотворена, единосущна Отцу Им же вся быша. [3] нас ради человек и нашего ради спасения сшедшаго с небес. и воплотившагося от Духа Свята, и от Марии Девы вочеловечьшася распятаго за ны при понтийстем Пилате, страдавша и погребена, и воскресшаго в третий день по писаниих, и восшедшаго на небеса и седяща одесную Отца. [4] и паки грядущаго со славою судити живым и мертвым. Его же царствию несть конца. [5] И в Духа Святаго Господа истиннаго и животворящаго, иже от Отца исходящаго, иже со Отцем и Сыном споклоняема и славима глаголавшаго пророки. [6] и во едину святую соборную и апостольскую церковь, исповедую едино крещение во оставление грехов. [7] чаю воскресения мертвым и жизни будущаго века, аминь.

Все седмь святых артикулов, святаго символа святыя соборныя и апостольския церкви. по числу святых седми вселенских соборов, едину церковь вся своя божественная уста, тако и святое евангелие тако святых апостол проповедание тако святых мученик, веру же и кровь. тако седмь святых вселенских соборов. тако символ святыя соборныя и апостольския церкви, внутрь персей церковных имже положи яко сердце в телеси Христове, и страшно запечатле, яко уже не будет время. разрешибося седмь печатей, поставиша седмь светилник златых. возгремеша седмь громов, воструби седмый ангел, соединишася седмь церквей, во едину церковь, яко же бо седмь церквей, сиречь ефесския, смирненская, пергамская, фиатирская, сардийския, филадельфийская, и лаодикийская, соединена суть со Христом, и едина есть церковь, седмь святых вселенских соборов, едино суть тамо седмосоставное Святаго Духа символа, едино есть исповедание святыя веры. А кто речет яко двема соборы составлен бысть кроме прочих святых пяти, тот проспися. а познай единодушно седми соборов, а не сами бо святии отцы составиша символ святыя веры, но Дух Святый теми действуя. положи того во седми составех, или артикулех, по числу седми святых соборов. яко да соединит вся своя воедино, еже имети равну часть, первому во втором, и яко седмому в первом. И се есть блажен и свят иже имать часть в первом воскресении. на сих бо вторая смерть области не имать. Прочее зри како Адаму и сущим из Адама, праведным часть есть в первом воскресении: но прежде увесть, яко всяк человек по естеству сугуб есть, и елико внешний наш человек, и изнемогает толико внутренний обновляется по писанию. Ты же смотри како Адама в первое воскресение от ада воскреси Господь половину человека, еже есть душа, и вторую еже есть тело соостави в земли. яко да второе, яко воскреси совершенно. и всех святых с ними, и ныне ждуще общаго воскресения со всеми святыми райскими жительми славити Бога во святой Троице единаго, яко же повеле Христос церковию седмию святых вселенских соборов, в няже желают ангели приникнути по писанию. еже глаголет да скажет ся ныне началом и властем на высоких церковию многоразличная Премудрость Божия по предложению век. И не иная бо мудрствуют души и душа праведных, но тояжде яже предаде святою соборною и апостольскою крестоносною церковию [ефес., зач. 253], то же и мудрование у них, таяжде вера едина, те же каноны и страшныя догмата, яже состави и предаде Дух Святый, седмию святых вселенских соборов, всем верным живым же и преставленным. от перваго человека и до последняго. И се есть часть общая всем верным в первом воскресении тоя тысящи. в ней вся сия созда по своему обетованию. Аще слушаем словес Его, аще повинуемся учению Его, аще веруем обетованию Его, то всяко имамы часть со всеми святыми в первом воскресении. А нерадящим о сих яже прочтохом, суд Божий ждет. И тако исполнит Господь церковное создание божественными же догматы и каноны совершив церкви исполнение. кончает и тысящу лет со запрещением, яко уже быти времени еже положити что или отъяти от божественных преданий во святой соборной и апостольской церкви. дондеже приидет Господь наш Исус Христос судити живым и мертвым Его же царствию несть конца. во християнех, а по страшном суде не будет конца никогда же. Его же царствию не бе начала тому и конца не будет. Того бо просим всегда молящеся глаголя, да приидет царствие Твое. да будет воля Твоя, яко на небеси и на земли. Яко же Господь научи нас, аще же кто не умудрит Господа нашего Исуса Христа. сиречь сугуба воля сугубо хотение сугубо действие сугубо царство по апостолу, иже глаголет, егда же предает царство Богу Отцу подобает бо Ему царствовати, дондеже положит враги своя подножие ногама своима. Ему же егда покорена будет всяческая. тогда будет всяческая во всех. аще не сугубое Господь умудрит нас то како познаем сию богословию Павлову, и кто ему сравнится в богословии. Мы же по скончании 1000 лет, и по развязании злоковарнаго сатаны врага церкви Христовой разсмотрим действо его како враждует церкви Христовой, како гонит ю горее нежели прежде. како отторже хоботом своим третию часть всего християнства. како строит угодники своими власть антихристову, сына погибели. како хощет посадити его в церкви Божией. аки Богу нашему умудрити предотечем его. еже возобладати везде книгами церковными. яко да препишут их на антихристову руку изметающе Истиннаго, и истинное. И еже воистинну от божественных писаний изметающе истиннаго Христа Бога нашего, ложь ухищряюще глаголати противу своим глаголом глаголюще облыгаша и облыгают. яко не подобает приимати еже Христос глаголет, и яко не прииде Христос, но приидет. и яко еще не сотвори сего Бог еже родитися Христу, та и тем подобная безчислено изрекше написаша во своя новыя богомерзския книги, а истинныя древняго благочестия книги обругаша и оплеваша, и вон из храмов церковных изметают, но Вышний не в рукотворенных храмех живет по писанию. О горе нам ныне живущим на земли, яко прииде время отдалече проповеданное на нынешнее плача достойное время. Яко жидове уже християне себе нарицают, християн прельщают. Християны не проспавшися с похмелья, тем веруют и не ощущают тех прелестей глаголют, аще не бы сии премудрии были, то не бы власти наши тем повинулися тии узрят. на тех Бог взыщет. мы же да ямы и пием а утрие умрем. О люте время нас постиже. разлучают нас со Христом истинным Богом нашим. и приводят к сыну погибели. О слепота пияных християн иже ждут явнаго жидовства, и предотечей антихристовых. а не внимают помраченной прелести их. Како бо ныне рекут еще многим християном сущим, не Христос Его же июдеи во Иеросалиме распяша, но той есть христос его же мы ныне проповедуем. Аще бы сия ныне рекли, то ни ли бы все людие устремилися быша на убиение их, и того ради приемши от сатаны помраченную прелесть и прельщают не явно. Но мы обычно вопием, церковный глас. двери двери Премудростию вонмем. И разсмотри како татие не дверию входят, но прелазя инуде. И символ святыя веры непорочный сый, приемше мерзость веры сотвориша его же проходя первый артикул ничто же смеяху рещи хульно. того ради яко ни жидове и ариане ничто же глаголют нань. А во втором артикуле слово, понеже ни жидове и ариане не видят. и они с ними согласишася, идеже бо речено бысть на посрамление Ариево. рожденна а не сотворенна. тамо лукавии ариане друга своего оправдати хотяща многосильную литеру а. первую отъемше, со жидами глаголют. рожденна не сотворена, яко бы еще не сотвори Бог. Се бо еже рождену быти Христу, в Него же християне веруют. Ты же смотри како едина литера по действу сатанину весь мир убивает. Безбожни бо ариане богохулныя глаголы на Сына Божия рече глаголя Того быти рожденна и сотворенна, а не единосущна Отцу, и того ради собра Дух Святый вселенский собор, яко прокленше ересь его, и самого непрощенной анафеме предавше, проповедят Сына Божия Господа нашего Исуса Христа Бога истиннаго от Бога истиннаго рождена а не сотворена единосущна Отцу. А не тако яко Арий блядословит, или яко помраченная прелесть изблева, яко рожденна еще не сотворенна, да в уме у них той разум лежит его же в новой книзе издати хотят. Аще Бог попустит да глупее ископается ров и прелесть народ християнский по действу лукаваго сатаны. Третии его же артикула слово, аще и всего артикула и всех его слов жидове ненавидят. но понеже и Арий молчит, и прелесть премолче, яко несть мощно явно отрещися им распятаго Бога нашего. В четвертом же артикуле аще и не явно отвергошася. но понеже реченно слово воцарившуся Христу глаголет церковь Его же царствию несть конца. А они начало царствия Христа отвращашеся глаголют, яко преже рожества Христова глагола архангел царствия Его не будет конца то в правду глаголет. Но сия глагола архангел прежде рожества Христова Христа Бога нашего. яко предгрядущему царствию Христову, егда родится Христос тогда царствию Его не будет конца. Прежде рожества Христова несть мошно было рещи, несть конца, егда еще не бе начала царствию. Сице несть мощно рещи не будет конца. егда царствует Христос. и не преста царствовати: но несть конца, кто во Христа верует той весть еже не блазнитися подобает. В пятом же артикуле не токмо всею церковию возмутиша, но и всею тварию и небом и землею потрясоша извержением истиннаго. отторгшебося от истинныя лозы Христа Сына Божия изсыхают. дондеже во огне згорят негасимом, и отбегше от истинныя двери Христа своего Господа пролазят инуде преступающе бо слово Христово, не имети Бога по писанию, а хулящии на Святый Дух, не имут оставления ни в сем веце ни в будущем. Оболгавше же святыя вселенския соборы отвержением словеси Христова, еже Дух Истинный положи всеми святыми райскими жителми, поколебаша, и вси святии вопиют к Богу на них глаголя: Доколе Господи Святый истинный не мстиши своего си хуления и нашего оболгания. Зри изметателю Истиннаго, в чем стоиши и чего ждеши, или ти даде Христос книгу отпускную глаголя. аще кто речет слово на Святый Дух не отпустится ему ни в сий век ни в будущий, и что может страшнее хуление сего словеси быти. еже рещи яко не подобает в символе Истинным нарицати Духа Святаго, аще и Христос нарече Того Истинным, то где христианство. В шестом же артикуле отметающеся всех святых церковных соборов преданий, иже и канонов, глаголют едину святую соборную. а еже и во едину отмещут да ничто же церковное прикоснется вере их. И того ради соборную истолковаша яко же от язык собрася, и того ради соборная глаголют, а еже глаголет в советех правых и в сонме велия дела Господня, изыскана во всех волях Его. и еже Бог прославляем в советех святых, того и не помянут. где християнство се бо не человек есть, но и скотов горше есть, еже что видит скот тому и верует, а не внутрь зрит щадимуя силу Божию. Седмый же артикул, един на два нечювственно разделиша, точию да сопротивятся святому седмочисленному сочислению, и святой соборной апостольской церкви. Еже бо чаю воскресения мертвым, и жизни будущаго века, аминь. Несть мощно разделити разве раскола ради церковнаго.

Слово 7.

О нечювственных християнех яже нарицаются православнии.

и прелесть хулят. а во прелести несмысленно утопоша и не ощущают.

Понеже в божественном писании глаголет, яко пришествие антихристово будет по действу сатанину, сатане же действовати попусти Бог во погибающих прелестию а не насильством. прелесть аще будет явна яко и прелесть, прелесть и наричется. яко нецыи мнозии погрузивше себе во прелесть, даже до ноздрей, и не разумеюще яко прелесть есть, глаголют како нецыи не приемлют новых наших исправлений, а исправльшии християне суть себе наричут християны, учения прелесть может быти. антихрист бо прельщати будет знаменьми и чудесы ложными глаголет писание, егда рекут вси людие, отступайте от Распятаго, и отрицайтеся Его, зане яко распят есть на древе и умре и погребен бысть, то вси негли видяху, а воскресша из мертвых никтоже видя. поклоняйтеся убо сему и чудному, ему же повинушася весь мир. и никто же может противу его единаго слова рещи, но вси поклонишаси ему от мала даже до велика их. Оле прелести, оле адово дно самовольное погружение, како могут знати прелесть. понеже и сего не внимают, яко будет прелесть. точию антихриста ждут безопасно, а истиннаго Бога и Спаса нашего Исуса Христа словес и учения отвращаются. иже глаголют о последних временах глаголя. блюдите да никтоже вас прельстит, мнози бо приидут во имя Мое и многих прельстят глаголет Господь. а не нуждею понудят яко ныне нуждею велят приимати новосоставленныя книги, но Бог сего не терпит и не потерпит. Зане молитвами пресвятыя Богородицы, весть Господь мучителей немилостивых изъимати от начальства. и низлагати со престол. а о прелестях последних времен, Дух Святый явственно глаголет, яко в последняя времена отступят нецыи от веры внемлюще духовом льстивым, и учением бесовским, ими же путь истинный похулится, и во умножении льстивых словес ловити будут по стихии мира а не по Христе и будут лжехристи, и лжеучители иже внесут ереси погибели, искупльшаго их Владыки Христа отметающеся, и приводяще себе скорую погибель антихриста. и яко имать приити отступление и прелести исполнится весь мир. и тогда явится человек греха сын погибели противник превозносяйся паче всякаго глаголемаго бога или чтилища, яко сести ему в церкви Божией аки богу. и показующе себе яко бог есть. Зри сести ему в церкви Божией аки богу. како сядет в церкви Богу живущему в ней и глаголющу, се Аз с вами есть во вся дни до скончания века. како сядет антихрист тамо идеже Христос живет. ты же смотри что есть церковь, церковнаго ради собрания созидаются храмы церковныя сиречь рукотворенныя нерукотворенных ради. о них же писание речет, яко Вышний в нерукотворенных храмех живет, ни от рук человеческих угождение приемлет. того бо ради из начала веры не восхоте Господь создати нерукотворенных храмов, но и созданных разорити попусти глаголя, яко не останется где камень на камени иже не раззорится: но Аз рече созижду церковь Мою и врата адова не одолеют. но попустит Бог сести антихристу в рукотворенных аки богу. тайна бо уже деется сего словеси. прежде бо от падения в Риме, церковь Божия именовашеся: а ныне тем глаголют костел, храм именуется да везде церковную память изтребивше, мерзость запустение поставлена будет. а истинной церкви Христовой гонение и бегство. поминающе жену Лотову, прорече Господь; идеже будет труп, тамо соберутся и орли глаголет Господь. Зане не стен ради Христос умре, ниже камения ради, но духовных ради храмов, иже не отмещутся словес Христовых, даже до смерти. а высокая вся и сладкая и безпечальная вся пообладает сын погибельный, дондеже рекут вси людие мир и утвержение. и внезапу нападет на них всегубительство по писанию. но яко же предрекохом. еже подобает быти прежде отступлению от веры в последняя времена, Зри во времена а не единою будет отступление. Рим бо единою отпаде и впад в непрощенное нечестие, похулити Дух Святый исхождением и от Сына. второе отпадение глаголемых униятов истреблением истиннаго из святаго символа православныя веры. третие отпадение оболганием святых вселенских соборов еже не прияти им в символ истиннаго, и не глаголати в символе Господа истиннаго, и отметником и преступником явитися словес Христовых учения иже глаголет. яко Дух истинный, иже от Оца исходит. Четвертое отпадение не у явися, и аще и не в долзе времени будет по предреченному но всячески будет по писанию, еже есть 1666. а о прелестех насеенных в мир на антихристову руку в книгах церковных их же содержат рукотворенныя храмы и не болезнуют. и не токмо не скорбят приемлюще развращенная в книгах. но и самих тех авторов приемлюще ни едина не сокрушися, зане не за те храмы умре Христос. и того ради попусти Бог в них поставляти мерзость запустение в книгах и иконах. но горе небрегущим о прелестех в последняя времена, прежде прихода сына погибели. мнози бо глаголют и совопрошаются о пришествии льстиваго сего, како приидет. и что творити начнет, и кая знамения сотворит прельщая, а о предтечех его, иже внесут ереси погибели, ими же путь истинный похулится, никто же воспоминает. то бо есть дело лукаваго сатаны. еже прелесть убо у небрегущих укрывати, да не явно будет. а самого сына погибели страхования и чудеса всем пред очима поставляти. а во книгах поврежденных точию имя Христово остави да не блазнятся люди како может тамо быти прелесть идеже Христос именуем есть. сего не разумеют безумнии, яко июдеи именуют Бога Авраамля, и призывают Бога Исаакова, и молятся Богу Израилеву, то почто Бог отмещется и не приемлет молитву и приношения их, и вся ереси купно имя Христово во всех своих книгах именуют. почто Христос ни единаго еретика ни книги их ни молитвы их не приемлет, зане вся книги их сиречь жидовския и еретическия перестроил сатана на свою на антихристову руку. а истинный Христос Бог наш, всех святых отвращает и отревает от того. и аще издалече до антихриста сице сатана действует, то кольми, егда уже близ приходит козни своя распрострет. а мы спим небрегуще о прелестех антихристовых предтечех. не тако бо нам подобает вооружатися противу самого антихриста. зане той может во погибающих. подобает и вооружатися противу прелестей его. многих бо рече прельстит аще возможно будет и избранных. но горе небрегущим во прелестех яже строит сатана прежде пришествия антихристова, и чающим яко не насеевше прелестей в мир антихрист приидет. и яко от самого антихриста прелесть начинается. а сего не внимают яко пришествие антихристово будет по действу сатанину. и той строит ему путь гладкий. а рече исполнивше прежде своя книги церковныя, сомнительных толкованиих разумлений, яко да везде воздвигнутся споры и раздоры между християны их же Господь наш Исус Христос издалеча видя страшно предглагола, блюдите да никтоже вас прельстит. мнози бо приидут лжехристи, и лжепророцы, и лжеучители и прельстят многих. и будет тогда скорбь велия якова же не бысть от начала миру даже до ныне и не будет. горе же непраздным и доящим в тыя дни. и возгласи Господь глас. се предрекох вам, святыя же ученицы и апостоли Господни, исполнившеся сицевых учений, и страшных запрещений еже рече Господь блюдите и прочая. всегда блюдошася, и всегда бояхуся глаголюще ко всем християном. дети последняя година, слышасте яко антихрист грядет, и ныне мнози антихристи суть. и мнози будут лжеучители, иже внесут в церковь ереси погибельныя. и от искупльшаго их кровию своею Владыки Христа Господа отметающеся, и приводяще себе скорую погибель, своего им владыку антихриста. тии бо по действу сатанину внесут льстивая учения в непорочныя книги церковныя, яко да отвратят християне слухи своя от истины, и к басням их уклонятся, еже похулити Дух истинный по писанию. и возлюбити латынскую прелесть, юже аще кто любо возлюбит и присовокупит ко церковному учению то римская ереси прелесть преможет в ней церковное учение. яко же бо сатанин язык, и его лукавая премудрость купно с ним спадоша с высоты небесныя, мерзска суть Богу и святым Его. тако поистинне римским языком, и вся премудрость языка их, по отпадении от веры мерзско суть Богу и всему християнству, разве прельщенным. прельщеннии же обтичют своим злохитрством море и сушу, да ухитрят еже прииати прелесть их християном. и ови убо сами от сатаны бывают, и ини реформовании яко повествуют нецыи от них, и ини же от тех научаеми бывают по действу сатанину. и ини истребляют святыя догматы, а ини влагают лукавая. иныя споры творят с лукавством яко барышники, и иныя приводят мудрейши паче себе лукавством яко мошенники да возмутят сердца незлобивых по писанию, да возглаголют сладкая горко, а горькая сладка, и да возглаголют свет тма, а тма свет, сиречь доброе зло, а злое добро. черное бело, а белое черно. да растворяюще словеса своя с вышереченною премудростию римскаго учения. сице яко прельстити. аще возможно будет и избранныя по словеси Господню. будет бо рече тогда скорбь велия, якова не бысть от начала миру и не будет. горе непраздным и доящим в тыя дни. О люте нам яко уже постигоша нас скорбь. несть бо несть мощно детем крещенным зле, веровати добре, сиречь крещенным без истиннаго веровати во истиннаго. несть мощно по писанию. еже глаголет, креститися подобает яко прияхом, а веровати яко крестихомся. тем же аще символ трижды глаголем от лица крещаемаго, да тако верует крещаемый, яко в символе трижды исповеда, то како веровати будет не тако крестился есть. но горе непраздным матерем, яко суд себе родят, и доят по словеси Господню. но сия вся на скончание века сего Богу всех Создателю попущающу, сатана действует. идеже бо ему возможно всея славы Божия из книг истребити да свою поставить тамо половину, истребити тщится злоковарным советом ухищряет да не явна будет козней его хитрость. аще ли же и половины невозможно. то третию часть, или четвертую, точию да примесится слава его к Божией славе. гордость бо его всегда надымает глаголати, да буду подобен Вышнему, и того ради ищет да приобщится слава его в человецех наипаче же во християнех. и аще не главу имети будет, то поне руку или ногу или перст един, сиречь не явно обнажит от всея веры яко прельстити адова врата, то поне тайною хитростию влагающе мерзость запустение во церковныя догмата. да будет в них утаенная хула на Бога и на святых Его. и влагающе мерзость запустение во крещении, и священства, да утаенна мерзость к Богу и крещения, и священства в человецех а они мнятся вся та цела содержати, а о прелести последних времен не внимают. и яко прелести исполнится весь мир, и потом антихрист приидет. сего сатана людем и в разум взяти не допущает, да не како ощутивше прелесть отбегнут лукавства сатанина. и от антихристовых прелестей како избудут поучатися и советовати начнут, и то есть брань вселукаваго диявола, на род человеческий, в последняя времена. яже уже нас явно постигоша, и прелестей антихристовых весь мир исполнен есть, и вся языки прежде просвещеныя святым крещением давно истопоша уже во прелести римскаго учения, во многоразличных гресех, и все готови суть со жидами повинутися ложным чудесем антихриста сына погибели. но о люте нам, яко и наш словенский язык, аще и последний во просвещении, но ни един от прежде просвещенных язык, тако всещедро от Бога ударован и обрадован. яко язык наш, иже не токмо полнотою благочестивых Христовых и апостольских и соборных преданий догмат святыя веры исполнен есть. из греческаго непорочнаго языка вся святыя книги преведены суть. но пребогатое человеколюбие являя на нас Христос Бог наш все цело языку разных земель, сиречь муровльской болгарской малороссийской, и белороссийской. и всему исполнению великия премудрости независтно исполненную грамоту даровал есть. ею же уже ныне не к тому похвалимся. примесибося уже и нашего языка книгам богохульное римское учение, со вселукавыми и злохитро утаенными прелестьми сице лукаво, яко многим не разумети, ниже познавати коварства их тех, но последних униятов, тако бо исткаша новосоставленныя книги с разными лестьми, яко бывает платно делано постава сутком, тако и книги наши имя точию российских книг содержат. а яже внутрь то Богу судить. от многих поне малая воспомянем, наченше повесть от богомерских жидов, четыреста лет тому скончася. егда богомерский народ жидовский от всех стран собравшеся совет сотвориша о законопреступном окаянстве своея жидовския ереси. како поживут в разсеянии разных стран глаголя. чаяние наше удалися на земли ждуще мессия. и отвсюду изгоняеми есмы, носяще на себе гнев Божий, и поругание от всех язык, не имуще царя, ни града на земли. где бы есмы главу приклонили; и гои нарицаемыи християне. всегда и везде сокрушают души наша глаголя: то вам за то яко исполнили есте меру отец ваших. они бо избиша пророков, а вы проповеданнаго от пророк, и нарицают правдивым месияшом Христа, Его же убиша отцы наши во Иеросалиме, при Понтийстем Пилате. его же предающе Пилату возопиша вси, глаголя: кровь Его на нас, и на чадех наших. а к сему на горшее нам отрекошася и царя глаголюще: не имамы царя, но токмо кесаря. а ныне что сотворим вне святаго града скитающеся. а Господу от нас несть молитвы, ни жертвы ни приношения, ни празднования, ни суботства, точию закон Моисеов в руках содержим, носяще того без пользы нашея, прочее что сотворим, ни ли лучьшим нам будет. аще и вне града святаго по закону Моисеову Богу молитися и празновати. да не ругаются нам, глаголя. писано есть о вас июдеох. яко будет вам беда велия на земли, и гнев на людех сих Божий на вас, и падете во острия меча, и пленени будите во вся языки. яко дние на вас суть, вашего отомщения. безчисленная глаголют нам ругающеся. и тако они дерзнуша по действу сатанину составити законопреступную книгу нареченную Толмут. и не точию уставили праздники свои и посты и суботы, богомерзкими догматы глаголя. нам вся мощна суть глаголати и творити разве яко да не прогневаем Бога израилева, молящеся во псалмех глаголя. яко же глаголахом будуще во святом граде глаголя. Господи прибежище бысть нам в род и род, и прочая. а ныне скитающимся нам в распленении во чюжих землях. несть мощно тако глаголати, Господи прибежище бысть нам в род и род и прочая. ныне подобает нам глаголати, яко прибежище иногда был еси нам. и иная словеса во псалмех Давыдовых, егда глаголахом яко от Господа милость и много от Него избавлении. ныне же всего того лишаемся не можем тако глаголати. но глаголем, яко у Господа милость и много избавление. но не к нам ныне скитающимся. и иная безумныя и богомерския глаголы положиша во предреченную книгу свою глаголемую Толмут. и им же вся сия подобнии им богоотступницы римляне ласкательно похваливше рекоша, тако творяще спасетеся. точию держитеся закона Моисеова и пророков. и тако римляне унею прияша, и вси книги новаго и ветхаго завета на жидовский перевод на антихристову руку преписаша и истолковаша. и тако всему миру предают, имуще прельстити своих рачителей, да вси станут тылом на восток, а лицем на запад. да вси глаголют развращенна и поют развращенная похваляюще закон Моисеов, и римское учение, и опресноки жидовския, и хулу на Святый Дух, и небрежением о словесех Господа истиннаго Бога нашего. и небрежением о святом божественном евангелии, и богохульно глаголати, яко не подобает словес Христовых тако приимати яко глаголет. обретаем бо Его глаголюща противная своим сдловесем. и иныя богохульныя глаголы ложныя на Христа истиннаго Бога нашего. и еже отврещися сугуба Христа по воплощении, и богомерзско глаголати лжуще на Господа и на святое евангелие [Скрижаль лист 94, 99], идеже бо глаголет Господь. аще кто речет слово на Сына Человеческаго, отпустится ему. они же сие слово Господне превратиша по лукавому совету их глаголя, аще кто речет слово на Сына, отпустится ему. а Человеческаго отвергоша, но о долготерпения Божия. како земля стерпе, како не пожре сатаниных угодников за сие лукавство. еже искати лжи на истинну Сына Божия. Зри христолюбче, како тя ищут лестию отвратити от Христа истиннаго, а превратити ко антихристу сыну погибели. все бо их мудрование по действу сатанину, еже хулу наводити на Христа Спаса нашего, и на святое Христово евангелие. и на всяко божественное писание глаголя: яко писмо убивает. ты же зри. апостол Ияков глаголет, яко писмо сиречь литера убивает а Дух животворит. а они глаголют яко писмо убивает, да омерзят нам чтения божественных писаний, могуще нас умудрити по писанию. паки зри дерзость нечестивых, яко Христос глаголет. и яко обретаем Христа противу себе глаголюща. иже речет на Сына отпустится ему. а иже речет на Святаго Духа не отпустится ему ни в сем веце ни в будущем. и яко аще приимем яко Христос глаголет то болий будет, Дух Святый нежели Сын. ты же смотри христолюбче и разсуждай праведно своего ради спасения. разсуждай паки глаголю да не со антихристом осужден будеши. тако ли Христос глаголет яко они лгу