Исповедайтеся Господеви и призывайте имя eго, возвестите во языцех дела eго; воспойте eму и пойте eму, поведите вся чудеса eго. Хвалитеся о имени святем eго; да возвеселится сердце ищущих Господа; взыщите Господа и утвердитеся, взыщите лица eго выну. Помяните чудеса eго, яже сотвори, чудеса eго и судбы уст eго, семя авраамле раби eго, сынове иаковли избраннии eго. Той Господь Бог наш; по всей земли судбы eго. Помяну в век завет свой, слово, eже заповеда в тысящы родов, eже завеща аврааму, и клятву свою исааку; и постави ю иакову в повеление и Израилю в завет вечен, гля; тебе дам землю ханааню, уже достояния вашего. Внегда быти им малым числом, малейшым и пришелцeм в ней, и преидоша от языка в язык и от царствия в люди ины; не остави человека обидети их и обличи о них цари; не прикасайтеся помазанным моим, и во пророцех моих не лукавнуйте. И призва глад на землю; всяко утверждение хлебное сотры. Посла пред ними человека; в раба продан бысть иосиф. Смириша во оковах нозе eго, железо пройде душа eго, дондеже прииде слово eго; слово Господне разжже eго. Посла царь и разреши eго; князь людий, и отпусти eго. Постави eго господина дому своему и князя всему стяжанию своему, наказати князи eго яко себе и старцы eго умудрити. И вниде Израиль во eгипет, и иаков пришелствова в землю хамову. И возрасти люди своя зело и укрепи я паче врагов их. Преврати сердце их возненавидети люди eго, лесть сотворити в рабех eго. Посла моисеа раба своего, аарона, eгоже избра себе; положи в них словеса знамений своих и чудес своих в земли хамове. Посла тму и помрачи, яко преогорчиша словеса eго. Преложи воды их в кровь и измори рыбы их. Воскипе земля их жабами в сокровищницах царей их. Рече, и приидоша пeсия мухи и скнипы во вся пределы их. Положи дожди их грады, oгнь попаляющь в земли их; и порази винограды их и смоквы их, и сотры всякое древо предел их. Рече, и приидоша прузи и гусeницы, имже не бе числа, и снедоша всяку траву в земли их, и поядоша всяк плод земли их. И порази всякаго первенца в земли их, начаток всякаго труда их; и изведе я с сребром и златом; и не бе в коленех их боляй. Возвеселися eгипет во исхождении их; яко нападе страх их на ня. Распростре облак в покров им, и oгнь, eже просветити им нощию. Просиша, и приидоша крастeли, и хлеба небеснаго насыти я; разверзе камень, и потекоша воды, потекоша в безводных реки; яко помяну слово святое свое, eже ко аврааму рабу своему. И изведе люди своя в радости и избранныя своя в веселии. И даде им страны язык, и труды людий наследоваша; яко да сохранят оправдания eго и закона eго взыщут.