Коль благ Бог Израилев правым сердцем. Мои же вмале не подвижастеся нозе; вмале не пролияшася стопы моя; яко возревновах на беззаконныя, мир грешников зря; яко несть восклонения в смерти их и утверждения в ране их; в трудех человеческих не суть, и с человеки не приимут ран. Сего ради удержа я гордыня их до конца; одеяшася неправдою и нечестием своим. Изыдет яко из тука неправда их; преидоша в любовь сердца. Помыслиша и глаголаша в лукавстве, неправду в высоту глаголаша; положиша на небеси уста своя, и язык их прейде по земли. Сего ради обратятся людие мои семо, и дние исполнени обрящутся в них. И реша; како уведе Бог? и аще eсть разум в вышнем? Се, сии грешницы и гобзующии в век удержаша богатство. И рех; eда всуе оправдих сердце мое и умых в неповинных руце мои, и бых язвен весь день, и обличение мое на утрених? Аще глаголах, повем тако; се, роду сынов твоих, eмуже обещахся; и непщевах разумети; сие труд eсть предо мною, дондеже вниду во святило Божие и разумею в последняя их. Oбаче за льщeния их положил eси им злая, низложил eси я, внегда разгордешася. Како быша в запустение? внезапу изчезоша, погибоша за беззаконие свое. Яко соние востающаго, Господи, во граде твоем образ их уничижиши. Яко разжжеся сердце мое, и утробы моя изменишася; и аз уничижен, и не разумех, скотен бых у тебe. И аз выну с тобою; удержал eси руку десную мою, и советом твоим наставил мя eси, и со славою приял мя eси. Что бо ми eсть на небеси? и от тебe что восхотех на земли? Изчезе сердце мое и плоть моя, Боже сердца моего, и часть моя, Боже, во век. Яко се, удаляющии себе от тебe погибнут; потребил eси всякаго любодеющаго от тебe. Мне же прилеплятися Богови благо eсть, полагати на Господа упование мое, возвестити ми вся хвалы твоя, во вратех дщере Сиони.