Бог богов Господь возглагола, и призва землю от восток солнца до запад. От Сиона благолепие красоты eго; Бог яве приидет, Бог наш, и не премолчит; oгнь пред ним возгорится, и окрест eго буря зелна. Призовет небо свыше, и землю, разсудити люди своя. Соберите eму преподобныя eго, завещающыя завет eго о жертвах. И возвестят небеса правду eго; яко Бог судия eсть. Услышите, людие мои, и возглю вам, Израилю, и засвидетелствую тебе; Бог, Бог твой eсмь аз. Не о жертвах твоих обличу тя, всесожжeния же твоя предо мною суть выну; не прииму от дому твоего телцeв, ниже от стад твоих козлов. Яко мои суть вси зверие дубравнии, скоти в горах и волове; познах вся птицы небeсныя, и красота селная со мною eсть. Аще взалчу, не реку тебе; моя бо eсть вселенная и исполнение eя. Еда ям мяса юнча? или кровь козлов пию? Пожри Богови жертву хвалы и воздаждь вышнему молитвы твоя; и призови мя в день скорби твоея, и изму тя, и прославиши мя. Грешнику же рече Бог; вскую ты поведаеши оправдания моя и восприемлеши завет мой усты твоими? Ты же возненавидел eси наказание и отвергл eси словеса моя вспять. Аще видел eси татя, текл eси с ним, и с прелюбодеем участие твое полагал eси; уста твоя умножиша злобу, и язык твой сплеташе льщeния; седя на брата твоего клеветал eси и на сына матере твоея полагал eси соблазн. Сия сотворил eси, и умолчах, вознепщевал eси беззаконие, яко буду тебе подобен; обличу тя и представлю пред лицем твоим грехи твоя. Разумейте убо сия, забывающии Бога, да не когда похитит, и не будет избавляяй. Жертва хвалы прославит мя, и тамо путь, имже явлю eму спасение мое.