Предыдущие молитвы литургии

Сый Владыко, Господи Боже Отче Вседержителю покланяемый! Достойно, яко воистину, и праведно, и лепо великолепию святыни Твоея, Тебе хвалити, Тебе пети, Тебе благословити, Тебе кланятися. Тебе благодарити, Тебе славити, Единаго воистину Сущаго Бога, и Тебе приносити сердцем сокрушенным и духом смирения словесную сию службу нашу, яко Ты еси даровавый нам познание Твоея истины, и кто доволен возглаголати силы Твоея, слышаны сотворити вся хвалы Твоя или поведати вся чудеса Твоя во всяко время.

Владыко всех, Господи небесе и земли и всея твари, видимыя же и невидимыя, Седяй на престоле славы и призираяй бездны, безначальне, невидиме, непостижиме, неописанне, неизменне, Отче Господа нашего Иисуса Христа, великаго Бога и Спасителя, Упования нашего, Иже есть образ Твоея благости, печать равнообразная, в Себе показуя Тя, Отца, Слово живое, Бог истинный, превечная Премудрость, Живот, Освящение, Сила, Свет истинный, Им же Дух Святый явися - Дух истины, сыноположения дарование, обручение будущаго наследия, начаток вечных благ, животворящая Сила, Источник освящения, от Него же вся тварь, словесная же и умная, укрепляема, Тебе служит и Тебе присносущное возсылает славословие, яко всяческая работна Тебе.

Тебе бо хвалят ангели, архангели, Престоли, Господьствия, Начала, Власти, Силы и многоочитии Херувими. Тебе предстоят окрест Серафими, шесть крил единому и шесть крил другому, и двема убо покрывают лица своя, двема же ноги, и двема летающе, взывают един ко другому, непрестанными усты, немолчными славословеньми победную песнь поюще, вопиюще, взывающе и глаголюще:

Народ: Свят, Свят, Свят Господь Саваоф, исполнь небо и земля славы Твоея; осанна в вышних, благословен Грядый во имя Господне, осанна в вышних.

С сими блаженными Силами, Владыко Человеколюбче, и мы, грешнии, вопием и глаголем: свят еси, яко воистину, и пресвят, и несть меры великолепию святыни Твоея, и преподобен во всех делех Твоих, яко правдою и судом истинным вся навел еси на ны.

Создав бо человека, персть взем от земли, и образом Твоим, Боже, почет, положил еси его в раи пищи, безсмертие жизни и наслаждение вечных благ, в соблюдение заповедей Твоих, обещав ему. Но преслушавша Тебе, истиннаго Бога, создавшаго его, и прелестию змиевою привлекшася, умерщвлена же своими прегрешеньми, изгнал еси его праведным Твоим судом, Боже, от рая в мир сей и отвратил еси в землю, от неяже взят бысть, устрояя ему пакибытия спасение в Самем Христе Твоем.

Не бо отвратился еси создания Твоего в конец, еже сотворил еси, Блаже, ниже забыл еси дела рук Твоих, но посетил еси многообразне ради милосердия милости Твоея: пророки послал еси, сотворил еси силы святыми Твоими, в коемждо роде благоугодившими Тебе: глаголал еси нам усты раб Твоих пророков, предвозвещая нам хотящее быти спасение: закон дал еси в помощь: ангелы поставил еси хранители.

Егда же прииде исполнение времен, глаголал еси нам Самем Сыном Твоим, Им же и веки сотворил еси, иже сый сияние славы Твоея и начертание ипостаси Твоея, нося же вся глаголом Силы Своея, не хищение непщева еже быти равен Тебе Богу и Отцу, но Бог Сый превечный, на земли явися, и человеком споживе, и от Девы Святыя воплощься, истощи Себе, зрак раба приемь, сообразен быв телу смирения нашего, да нас сообразны сотворит образу славы Своея.

Понеже бо человеком грех вниде в мир и грехом смерть, благоволи Единородный Твой Сын, Сый в недрех Тебе, Бога и Отца, быв от Жены Святыя Богородицы и Приснодевы Марии, быв под законом, осудити грех во плоти Своей, да, во Адаме умирающе, оживотворятся в Самем Христе Твоем. И, пожив в мире сем, дав повеления спасительная, отставив нас прелести идольския, приведе в познание Тебе, истиннаго Бога и Отца, стяжав нас Себе люди избранны, царское священие, язык свят, и очистив водою и освятив Духом Святым, даде Себе измену смерти, в ней же держими бехом, продани под грехом, и, сошед Крестом во ад, да исполнит Собою вся, разреши болезни смертныя. И воскрес в третий день и путь сотворив всякой плоти еже из мертвых Воскресением, яко не бяше мощно держиму быти тлением Начальнику жизни.

Бысть Начаток умерших, перворожден из мертвых, да будет Сам вся, во всех первенствуяй. И, возшед на Небеса, седе одесную величествия Твоего на высоких, Иже и приидет воздати комуждо по делом его. Остави же нам воспоминания спасительнаго Своего страдания сия, яже предложихом, по Его заповедем. Хотя бо изыти на вольную, и приснопамятную, и животворящую Свою смерть, в нощь, в нюже предаяше Себе за живот мира, приемь Хлеб на святыя Своя и Пречистыя руки, показав Тебе, Богу и Отцу, благодарив, благословив, освятив, преломив:

Даде святым Своим учеником и апостолом, рек: приимите: ядите, Сие есть Тело Мое, еже за вы ломимое во оставление грехов.

Народ: Аминь.

Подобне и Чашу от плода лознаго приемь, растворив, благодарив, благословив, освятив:

Даде святым Своим учеником и апостолом, рек: пийте от нея вси, Сия есть Кровь Моя Новаго Завета, яже за вы и за многи изливаемая во оставление грехов.

Народ: Аминь.

Сие творите в Мое воспоминание; елижды бо аще ясте Хлеб сей и Чашу сию пиете, Мою смерть возвещаете, Мое Воскресение исповедаете. Поминающе убо, Владыко, и мы спасительная Его страдания, животворящий Крест, тридневное погребение, еже из мертвых Воскресение, еже на небеса возшествие, еже одесную Тебе, Бога и Отца, седение, и славное и страшное Его второе пришествие

(Подымая дискос и Чашу): Твоя от Твоих Тебе приносяще о всех и за вся.

Народ: Тебе поем, Тебе благословим, Тебе благодарим, Господи, и молим Ти ся, Боже наш.

Господи, иже пресвятаго Твоего Духа в третий час апостолом Твоим низпославый, Того, Благий, не отими от нас, но обнови нас, молящих Ти ся.

Сердце чисто созижди во мне, Боже, и дух прав обнови во утробе моей.

Господи, иже пресвятаго Твоего Духа в третий час апостолом Твоим низпославый, Того, Благий, не отими от нас, но обнови нас, молящих Ти ся.

Не отвержи мене от Лица Твоего и Духа Твоего Святаго не отими от мене.

Господи, иже пресвятаго Твоего Духа в третий час апостолом Твоим низпославый, Того, Благий, не отими от нас, но обнови нас, молящих Ти ся.

Сего ради, Владыко Пресвятый, и мы, грешнии и недостойнии раби Твои, сподобльшиися служити святому Твоему Жертвеннику, не ради правд наших - не 6о сотворихом что благо на земли, - но ради милости Твоея и щедрот Твоих, яже излиял еси богатно на ны, дерзающе приближаемся святому Твоему Жертвеннику. И, предложше вместообразная Святаго Тела и Крове Христа Твоего, Тебе молимся и Тебе призываем, Святе святых, благоволением Твоея благости, приити Духу Твоему Святому на ны и на предлежащыя Дары сия, и благословити я, и освятити, и показати

Благословляя: Хлеб убо Сей - Самое Честное Тело Господа и Бога и Спаса нашего Иисуса Христа. Аминь.

Благословляя: Чашу же сию - Самую Честную Кровь Господа и Бога и Спаса нашего Иисуса Христа. Аминь.

Излиянную за живот мира. Аминь.

Благословляя: Преложив Духом Твоим Святым. Аминь, аминь, аминь.

Земной поклон

Нас же всех, от единаго Хлеба и Чаши причащающихся, соедини друг ко другу, во единаго Духа Святаго причастие: и ни единаго нас в суд или во осуждение сотвори причаститися Святаго Тела и Крове Христа Твоего. Но да обрящем милость и благодать со всеми святыми, от века Тебе благоугодившими, праотцы, отцы, патриархи, пророки, апостолы, проповедники, благовестники, мученики, исповедники, учители и со всяким духом праведным, в вере скончавшимся,

изрядно о пресвятей, пречистей, преблагословенной, славней Владычице нашей Богородице и Приснодеве Марии.

(Каждение): О Тебе радуется, Благодатная, всякая тварь, ангельский собор и человеческий род. Освященный Храме и Раю словесный, девственная похвало, из Нея же Бог воплотися и младенец бысть, прежде век Сый Бог наш: ложесна бо Твоя престол сотвори и чрево Твое пространнее небес содела. О Тебе радуется, Благодатная, всякая тварь, слава Тебе.

Далее